काठमाडौं – नेपालीहरुको महान् पर्व बडादशैंको दशौं अर्थात् मुख्य दिन आज शुक्रवार आफ्ना मान्यजनबाट टीका तथा जमरा लगाई हर्षोल्लासका साथ विजयादशमी पर्व मनाइँदैछ ।

विजयादशमीका दिन शुक्रबार बिहान ८ः१९ बजे देवी विसर्जन र बिहान १०ः०२ बजे टीका लगाउनका लागि शुभ रहेको नेपाल पञ्चांग निर्णायक समितिका अध्यक्ष प्रा. श्रीकृष्ण अधिकारीले बताए ।

विजयादशमीका दिन शुक्रबार दिनभर देवीको प्रसाद लगाउने साइत भए पनि दिनभरमध्येमा राम्रो समयको साइत १०ः०२ बजेको दिइएको उनले जानकारी दिए ।

‘अत्यावश्यक परेकाले देवी बिसर्जन गरेपछि टीका लगाउन हुन्छ, १०ः०२ बजेको साइत नै कुर्नुपर्दैन, देवी बिसर्जनसम्म पनि कुर्न नसकिने अवस्था छ भने सूर्योदयपछि देवी बिसर्जन गरेर टीका लगाउन हुन्छ,’ उनले भने ।

समितिले दिएको साइतको समय प्रभावशाली भएकाले सक्नेले उत्तम समयमा टीका लगाउने गरी तयारी गर्न समितिले आग्रह गरेको छ । नसक्नेका लागि विजयादशमीको दिन बिहानदेखि अखिल बलिपूर्तिका लागि पूजा गरेका सबै सामग्री नसेलाएसम्म टीका लगाउन कुनै समस्या नहुने बताइएको छ ।

विदेशबाट आउनेका लागि भने अखिल बलि पूर्ति गरेपछि पनि प्रसाद बाँकी राखेर कोजाग्रत पूर्णिमाका दिनसम्म पनि टीका लगाइदिन सकिने समितिले जनाएको छ ।

विजयादशमीका दिन चन्द्रमा मकर राशिमा रहेकाले टीका लगाइमाग्ने मानिस पूर्व फर्कनुपर्ने समितिले जनाएको छ । लगाइदिने मानिस पश्चिम फर्कंदा मकर राशिमा रहेका चन्द्रमा दाहिने हुन्छन् । चन्द्रमा दाहिने वा सम्मुख पारेर टीका लगाउनुपर्ने शास्त्रीय मान्यता रहेको छ ।

विजयादशमीका दिन बिहान नवदुर्गाको फेरि पूजा आराधना गरी जया, विजया, अजिता, अपराजिता गरी ४ देवीको पूजा आराधना गरेर देवी बिसर्जन गरिन्छ । विजयादशमीका दिन आफ्ना मान्यजनबाट टीका ग्रहण गर्दा अरु फूलको सट्टा समृद्धिको प्रतिक पहेंलो जमरा नै प्रयोग गर्ने गरिन्छ ।

घटस्थापनाका दिन राखिएको जमरा आज नवदुर्गाको प्रसादका रुपमा लगाइने गरिन्छ । घटस्थापना गरिएको पूर्ण कलशबाट अभिषेक गरी नवदुर्गाको प्रसादस्वरुप रातो टीका र जमरा लगाउने वैदिक सनातनी परम्परा छ । केही जाति र सम्प्रदाय विशेषले भने सेतो अक्षताको टीका लगाएर पनि विजयादशमी पर्व मनाउने गरेका छन् । 

असत्यमाथि सत्य र आसूरी शक्तिमाथि दैवी शक्तिको विजयका रुपमा बडादशैं पर्व मनाउने परम्परा बसेको शास्त्रीय प्रमाण छ । यस पर्वअन्तर्गत नवरात्रिका उपलक्ष्यमा घटस्थापनादेखि ९ दिनसम्म विभिन्न शक्तिपीठ तथा दशैंघरमा प्रत्येक दिन पूजाअर्चनासहित दूर्गा सप्तशती चण्डी र भगवतीको स्तोत्र पाठ गरेपछि त्यसको प्रसाद शुक्रबारदेखि कोजाग्रत पूर्णिमामा अखिल बलि पूर्ति नभएसम्म लगाउने गरिन्छ ।

नवरात्रका ९ दिनसम्म दशैंघरमा दुर्गा भवानीको पूजाआराधना गरी राखिएको जमरा सहितको टीका शुक्रवारदेखि ५ दिनसम्म लगाउने प्रचलन छ । पूजाकोठा तथा दशैंघरमा विधिपूर्वक राखिएको जमरा आजैका दिन देवीपूजा बिसर्जन गरी निकालिएपछि पूर्ण घडाको जलले अभिषेक गरी आफ्ना मान्यजनबाट नवदुर्गा भवानीको प्रसाद, टीका र जमरा लगाई आशीर्वाद थाप्ने गरिएको छ ।

टीकाका दिन परिवारमा आफूभन्दा ठूलाबडा, बाजेबज्यै, बुवाआमा, गुरुपुरोहित तथा मान्यजनको हातबाट नवदुर्गा भवानीको टीका, जमरा तथा प्रसाद थापी उनीहरुबाट यश, ऐश्वर्य वृद्धि तथ दीर्घायु प्राप्त होस् भनेर आशीर्वाद लिने गरिएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

विश्वभर रहेका नेपालीका लागि दशैँको टीका साइत सार्बजनीक [नालिबेली]

नेपाली कांग्रेस सर्लाही - काठमाडौं सम्पर्क समितिले दियो दशैँको शुभकामना

दशैँकाे विदा घटस्थापनादेखि नै ?

यसपाली राष्ट्रपतिलगायतले दशैँको टिका कसैलाई लगाइदिन नपाउने

गृहबाट देशव्यापीरुपमा आयो कडा निर्देशन, यो पालीको दशैंमा खलबल

पहिलो पटक दशैंका लागि खसीबोकाको मासुको मुल्य तोकियो