काठमाडौं - सात प्रदेशमध्ये कोसीमा रहेको एमाले नेतृत्वको सरकार पनि संकटमा परेको छ ।

सत्तारुढ माओवादीले समर्थन फिर्ता लिँदै आफ्ना दुई मन्त्रीलाई बोलाएपछि कोसीमा नयाँ सरकार बन्छ कि मध्यावधि निर्वाचन होला भन्ने चासो बढेको छ ।

९३ सदस्यीय प्रदेशसभामा बहुमतका लागि ४७ सदस्य आवश्यक पर्छ । एमालेका ४०, कांग्रेस २९, माओवादी १२, राप्रपाका ६, एकीकृत समाजवादी चार र जसपाको एक सिट छ ।

अहिले सरकारमा रहेको एमाले र राप्रपाको ४६ मत छ । सभामुखबाहेक विपक्षीतिर ४६ मत छ । माओवादीबाट सभामुख निर्वाचित बाबुराम गौतमले निर्णायक अवस्थाबाहेक मत हाल्न पाउँदैनन् । त्यसैले दुवैतिर बराबर मत हुन्छ ।

यदि विश्वासको मत लिएको अवस्थामा ४६–४६ अर्थात् बराबरी मत भएमा मात्र सभामुखले हाल्न पाउने हो । त्यस्तो जोखिम मोलेर नयाँ सरकार बन्ला भन्ने अझै धेरैले विश्वास गरेका छैनन् ।

यदि राप्रपा एमालेसँगको मोर्चामा कायम रहिरहेमा नयाँ सरकार बनाउन अंकगणित निकै कमजोर छ । त्यसैले अहिले सभामुख गौतमले राजीनामा दिएमा मात्र नयाँ सरकार बन्ने अवस्था छ । सभामुखले राजीनामा दिए कांग्रेस माओवादी गठबन्धनसँग ४७ मत हुन्छ ।

जुन सरकार बनाउन पर्याप्त हुन्छ । सरकार बनेपछि फेरि सभामुखको निर्वाचन हुने सहमति बनेको छ । तर माओवादीले आफले मुख्यमन्त्री पाउनुपर्ने दाबी गर्दै आएको छ ।

कोसीमा कांग्रेस, माओवादी र एकीकृत समाजवादी सबैले सरकारको नेतृत्वको दाबी गरेका छन् । जसपा निर्णायक भूमिकामा छ । राप्रपाले आफूलाई मुख्यमन्त्री दिएमा गठबन्धनमा सामेल हुने जनाउ दिएको छ । तर कांग्रेस माओवादी मानेका छैनन् ।

मुख्यमन्त्री हिक्मत कार्की अल्पमतमा परिसकेका छन् । त्यसैले उनले विश्वासको मत लिनुपर्ने वा राजीनामा दिनुपर्ने अवस्था सिर्जना भएको छ । एमाले ठूलो पार्टी भएकाले अल्पमतको सरकार बनाउने विकल्प उसैलाई छ ।

तर अल्पमतको सरकारले बजेट ल्याउन मिल्दैन । ल्याए पनि पास हुने सम्भावना छैन । त्यसैले मध्यावधिको चर्चा सुरु भएको छ । जनता समाजवादी पार्टीका अध्यक्ष उपेन्द्र यादवले कोसी प्रदेशमा नयाँ सरकार बन्ने र मध्यावधिको सम्भावना नरहेको टिप्पणी गरेका छन् । बुधबार संसदमा भवनमा सञ्चारकर्मीले सोधेको प्रश्नमा यादवले सहज रुपमा नयाँ सरकार बन्ने दाबी गरे ।

‘प्रदेश एक (कोसी) मा नयाँ सरकार बन्छ । मध्यावधिमा जाने अवस्था अउँदैन । त्यसखालको वातावरण जसपाले बन्न दिँदैन,’ उनले भने । तर कसरी सरकार बन्छ भन्ने उनले बताउन सकेनन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

कोसी प्रदेशमा राप्रपाले एमाले नबोक्ने, माओवादीले समर्थन फिर्ता लिँदै

कोसी सरकारबाट बाहिरिने माओवादी निर्णय, एमालेका मुख्यमन्त्री कार्की अल्पमतमा

कोसीमा गडबड, बजेट ल्याउन संसद् अधिवेशन अन्त्य गर्दै मुख्यमन्त्री कार्की

अरुलाई परमादेश दिँदा उछितो काढ्ने एमालेमा आफ्नोले परमादेश पाउँदा हर्षबढाइँ

कोशीमा परमादेशी मुख्यमन्त्री कार्कीले बजेटसम्बन्धी नयाँ अध्यादेश ल्याउने

कुर्सी संकटमा परेपछि हारगुहार गर्न काठमाडौं आइपुगे कोशीका मुख्यमन्त्री