बानियाँलाई हराएको खुसियालीमा होटल एभोकाडोमा कांग्रेसको डिजे डान्स
बानियाँलाई हराएको खुसियालीमा होटल एभोकाडोमा कांग्रेसको डिजे डान्स
हेटौंंडा– पार्टी नेतृत्वको आत्मघाती हठका कारण केन्द्रसहित आठैवटा सरकार हातबाट गुमेको पीडाकै बेला हेटौंडामा कांग्रेस नेताहरूले अर्को चर्तिकला गरेका छन् । कांग्रेसी नेताहरूको हर्कतले कम्युनिस्टहरूसमेत लाजले भुतुक्क भएका छन् ।
सन्दर्भ हो नेपाली कांग्रेसको बागमती प्रदेश संसदीय दलको नेताको निर्वाचन । दलको नेताको निर्वाचन पार्टीको आन्तरिक निर्वाचन हो । यसमा पक्ष र विपक्ष पार्टीकै नेताहरू हुन्छन् । कांग्रेसले आन्तरिक लोकतन्त्रलाई मजबुत बनाउन केन्द्रसहित सातै प्रदेशमा दलको नेता निर्वाचनबाट टुंगो लगाउने निर्णय गरेको थियो । जसअनुसार लुम्बिनी र सुदूरपश्चिम प्रदेशबाहेक अन्यत्र चयन भइसकेका छन् ।
यसैक्रममा पुस १३ गते मकवानपुरको हेटौंडामा दलको नेता निर्वाचन सम्पन्न गरियो । कांग्रेस दलको नेतामा इन्द्र बानियाँ र बहादुरसिंह लामा उम्मेदवार थिए । बानियाँ कांग्रेसको बागमती प्रदेश सभापति र लामा केन्द्रीय सदस्यसमेत हुन् । दुवै नेता संस्थापन पक्षकै हुन् । तर निर्वाचनका बेला पार्टी सहमहामन्त्री महालक्ष्मी उपाध्याय डिनाकै डिजाइनमा कांग्रेस र कम्युनिस्टबीचको जस्तो माहोल खडा गरियो । बानियाँ हराउन हात धोएर लागेकी डिनाले साम, दाम, दण्ड, भेद सबै उपाय अवलम्बन गरेको कांग्रेस नेताहरू बताउँछन् ।
बागमती प्रदेशमा कांग्रेसबाट ३७ सांसद छन् । बागमती प्रदेश सभापतिसमेत भएकाले नेता बानियाँले सबैलाई हेटौंडाकै विभिन्न होटलमा बस्ने व्यवस्था मिलाएका थिए । तर, सहमहामन्त्री डिनाले २२ सांसदलाई लिएर निर्वाचनको अघिल्लो रात चितवनको सौराहको एक रिसोर्टमा राखेकी थिइन् । उनीहरू सबै मतदानका बेला मात्र हेटौंडा आइपुगेका थिए । सहमतिमै दलको नेता छान्ने प्रयास असफल भएपछि एक घन्टा ढिलो गरी निर्वाचन भयो । लामा २१ मत ल्याएर विजयी भए । बानियाँले १६ मत पाए ।
लामा दलको निर्वाचन भएको भन्दा पनि होटल एभोकाडोमा बसेका सहमहामन्त्री डिनासहित उनको पक्ष बानियाँलाई हराउन सफल भएको भन्दै खुसियाली मनाउन थाले । होटलमै रहेका लामालाई सबैभन्दा पहिले डिनाका श्रीमान् दिनेश उपाध्यायले फूलको माला लगाइदिए । त्यसपछि अरुले बधाई दिए ।
उपाध्याय तिनै हुन् जसलाई नेपाली कांग्रेसका सभापति शेरबहादुर देउवाले प्रधानमन्त्री हुँदा गत असोज १४ गते राष्ट्रिय बीमा कम्पनी लिमिटेडको सञ्चालक समितिको अध्यक्षमा नियुक्त गरेका थिए । कांग्रेस मकवानपुरका सामान्य कार्यकर्तासमेत रहेका उपाध्यायलाई पत्नी डिनाकै दबाबमा देउवाले अध्यक्षमा नियुक्त गरेका थिए । उपाध्याय चार वर्षका लागि नियुक्त भएका हुन् । २०७४ को स्थानीय तहको निर्वाचनमा वडाध्यक्षमा पराजित उपाध्यायलाई श्रीमतीकै दबाबमा बिमा कम्पनीको अध्यक्षमा नियुक्त गरिएको भन्दै कांग्रेसमा असन्तुष्टि उत्पन्न भएको छ । कांग्रेसको पकड रहेको हेटौंडा उपमहानगरपालिका वडा नम्बर २ मा उठेका उपाध्याय लज्जास्पद ढंगले पराजित भएका थिए ।
लामालाई बधाई दिएसँगै बिहीबार साँझ होटल एभोकाडोमा डिजे डान्स सुरु भएको थियो । महँगा मूल्यका रक्सी र बियर खाएर डिना पक्षका प्रदेश सांसदहरू नाचेका थिए । पार्टीकै एउटा नेतालाई पराजित गरेको खुसियालीमा अर्को पक्षले डिजे डान्ससहितको रंगीन पार्टी दिएपछि मकवानपुरका कम्युनिस्टहरूले 'अब कांग्रेस सकिएछ' भन्दै खुसी मनाएका थिए ।
मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।
यो पनि
मिडिया डबली
लेखकबाट थप
ताजा अपडेट
ट्रेन्डिङ
-
डबली नेटवर्क्स प्रा.लि, अनामनगर, काठमाडौँ
- फोन नम्बर :९८०११२३३७१
- [email protected]
- वेबसाईट: www.mediadabali.com
- सूचना विभाग दर्ता नं.::१८१/ ०७३ -०७४