काठमाडौं - उच्च अदालत पाटनले शुक्रबार नक्कली शरणार्थी प्रकरणमा फैसला सुनाउने भएको छ ।

एक सातादेखि न्यायाधीशद्वय प्रकाश खरेल तथा जनक पाण्डेको इजलासमा भइरहेको मुद्दाको सुनुवाइ बिहीवार सकिएकाले आज निर्णय हुनसक्ने उच्च अदालत पाटनका प्रवक्ता तीर्थराज भट्टराईले जानकारी दिएका छन् ।

नक्कली भुटानी शरणार्थी प्रकरणको मुद्दामा काठमाडौं जिल्ला अदालतले सुनाएको थुनछेक आदेशविरुद्ध उच्च अदालत पाटनमा पुनरावलोकन निवेदन दायर भएको थियो ।

जिल्ला अदालतको आदेशानुसार पुर्पक्षका लागि थुनामा रहेका अभियुक्तहरूको तर्फबाट बिहीवार जवाफी बहस सकिएसँगै सुनुवाइ सकिएको हो ।

बुधवार सरकारी पक्षबाट सरकारी वकिलहरूले वहस पुरा गरेका थिए ।

अदालतले नक्कली भुटानी शरणार्थी प्रकरणका अभियुक्तहरूको हकमा जिल्लाकै थुनछेक आदेशलाई सदर गर्ने अथवा आदेश खारेज गर्ने भन्ने निर्णय सुनाउने छ ।

नक्कली भुटानी शरणार्थी बनाएर अमेरिका लगायतका देशमा पठाइदिने भन्दै नेपाली नागरिकबाट करोडौँ रकम उठाएर ठगी गरेको प्रकरणमा पूर्व–उपप्रधानमन्त्री टोपबहादुर रायमाझी, पूर्वगृहमन्त्री बालकृष्ण खाणँ, तत्कालीन सचिव टेकनारायण पाण्डेसहितका व्यक्तिहरु प्रतिवादी छन् ।

काठमाडौं जिल्ला अदालतले एमाले नेता रायमाझी र कांग्रेस नेता खाँणसहितका प्रतिवादीलाई पुर्पक्षका लागि थुनामा पठाएको थियो ।

जिल्ला अदालतले गत असार १ गते सुनाएको थुनछेक आदेशविरुद्ध उनीहरूले उच्च अदालतमा पुनरावलोकन निवेदन दिएका थिए ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।