काठमाडौं । प्रधानमन्त्री केपी शर्मा ओलीले नेपाल विद्युत प्राधिकरणका कार्यकारी निर्देशक कुलमान घिसिङलाई हटाइएको बारे संसदमा आफूले जवाफ दिनु नपर्ने बताएका छन्।
युवा संघको कार्यक्रममा बोल्दै प्रधानमन्त्री ओलीले सरकारले एउटा कर्मचारी हटाउँदा संसद अवरोध गर्ने प्रतिपक्षी दलहरूप्रति कटाक्ष गरे।
सरकारले एउटा कर्मचारीलाई हटाउँदा केहीले छाती पिटिपिटी रोइरहेको टिप्पणी गर्दै प्रधानमन्त्री ओलीले आफूले संसदमा जवाफ दिइरहनु नपर्ने स्पष्ट गरे।
कुलमानलाई हटाउनुपर्ने कारणबारे सरकारले जवाफ दिनुपर्ने भन्दै विपक्षी दलहरूले बुधबार दुई पटक बसेका बैठक अवरुद्ध गरेका थिए।
यसप्रति लक्षित गर्दै ओलीले भने, ‘ प्रधानमन्त्रीले जवाफ दिइसक्यो । एउटा हटायो, अर्को नियुक्ति गर्यो, सक्कियो । यही हो जवाफ । उहाँहरूलाई सहयोग हुने उहाँहरूले जो भन्यो त्यही नियुक्ति गर्ने हाम्रो काम होइन।’
प्रधानमन्त्री ओलीले यही चैत १८ गतेभित्र अध्यादेशहरूलाई प्रतिस्थापन विधेयक ल्याएर पारित गर्नुपर्ने अवस्थामा त्यसलाई रोक्न विपक्षीले सदन अवरोधको काम थालेकामा चिन्ता व्यक्त गरे।
विपक्षीलाई आग्रह गर्दै प्रधानमन्त्रीले भने, ‘यति सस्तो, यति हल्का र यति उत्ताउलो नहुनुस् तपाईँहरु। प्रधानमन्त्रीका सवालमा जथाभावी नबोल्नुस्। आखिर तपाईँहरु चिसै पानीले नुहाउनुपर्छ । हामी न मात्तिछौँ । न आत्तिन्छौँ । धैर्यपूवर्क अगाडि बढ्छौँ ।’
