काठमाडौं - एमाले अध्यक्ष केपी ओलीको गृह प्रदेश कोशीमा पार्टीको नेतृत्व चयनको विषयमा निकै रोचक घटना भएको छ ।

विगतमा एमाले मोरङको अध्यक्षमा जसले पराजित गरेको थियो, अहिले कोशी प्रदेश अध्यक्षमा पहिले हारेकैले जितेका छन् । एमाले कोशी प्रदेशको अध्यक्षमा घनश्याम खतिवडा विजयी भएका छन् ।

खतिवडाले अर्का प्रत्यासी विनोद ढकाललाई ८२ मतले पछि पार्दै विजयी भएका हुन् । पार्टी अध्यक्ष केपी ओलीको समर्थन पाएका मोरङको लेटाङ नगरपालिकाका खतिवडाले ५१२ मत पाए ।

विराटनगरका ढकालले ४३० मत प्राप्त गरे । विगतमा ओली निकट मानिने ढकालले अहिले उनको साथ पाएनन् । ओलीले विगतमा माधव नेपाल निकट रहेका खतिवडालाई साथ दिए ।

पार्टीको पाँचौँ जिल्ला अधिवेशनमा तत्कालीन ओली पक्षका ढकालसँग अध्यक्षमा पराजय बेहोरेका तत्कालीन माधव नेपाल पक्षका खतिवडाले प्रदेश अध्यक्षमा पार्टी अध्यक्ष ओलीको साथ पाएर उनलाई पराजित गरेर हुन् । दुईपटक मोरङ एमालेको अध्यक्षसमेत भइसकेका केन्द्रीय सदस्य ढकालले पराजय व्यहोरेका हुन् ।

पार्टी अध्यक्ष ओलीको प्रथम कोशी प्रदेश अधिवेशनमा सर्वसम्मत गर्ने निर्देशनलाई चुनौती दिँदै ढकाल र खतिवडा प्यानल बनाएरै चुनावी प्रतिस्पर्धामा उत्रेका थिए ।

अधिवेशनमा नौ सय ९७ जना प्रतिनिधिमध्ये नौ सय ७७ जनाले मात्र मतदान गरेका थिए । शुक्रबार अध्यक्ष ओलीले विराटनगरमा उदघाटन गरेको अधिवेशनमा सर्वसम्मत नेतृत्व चयन हुन नसकेपछि निर्वाचन प्रक्रिया अघि बढाइएको थियो । उम्मेदवारहरु आ–आफनो प्यानल बनाएर निर्वाचनमा सहभागी भएका थिए ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।