काठमाडौं - नेपाली कांग्रेसले पार्टी र सभापति गगनकुमार थापाको नेतृत्वविरुद्ध विभिन्न सञ्चारमाध्यम तथा सामाजिक सञ्जालमार्फत भ्रमपूर्ण सूचना फैलाउने काम भइरहेको भन्दै आपत्ति जनाएको छ । कांग्रेसले सरकारका पछिल्ला गतिविधिमाथि उठिरहेका प्रश्न र विवादबाट जनताको ध्यान अन्यत्र मोड्न प्रतिपक्षी दललाई लक्षित गरेर योजनाबद्ध प्रचारबाजी भइरहेको आरोप लगाएको छ ।

सभापति गगनकुमार थापाको सचिवालयले सार्वजनिक गरेको विज्ञप्तिमार्फत पार्टी र नेतृत्वको वैधानिकतामाथि प्रश्न उठाउने गरी आएका समाचार तथा आरोपहरू तथ्यहीन रहेको जनाएको हो । सचिवालयले यस्ता प्रचारलाई निराधार, कपोलकल्पित र राजनीतिक पूर्वाग्रहबाट प्रेरित भएको टिप्पणी गरेको छ ।

कांग्रेसले आफ्नो नेतृत्व र पार्टी संरचनासम्बन्धी विवादलाई कानुनी तथा संस्थागत प्रक्रियाबाटै टुङ्ग्याइसकेको दाबी गरेको छ । पार्टी विधान र प्रचलित कानुनअनुसार सम्पन्न विशेष महाधिवेशनबाट नेतृत्व तथा निर्णयको आधिकारिकता स्थापित भएको र त्यसलाई निर्वाचन आयोग तथा अदालतका निर्णयले समेत पुष्टि गरेको विज्ञप्तिमा उल्लेख छ ।

त्यस्तै, संविधान, प्रचलित कानुन, पार्टी विधान र सर्वोच्च अदालतको आदेशलाई आधार बनाएर सम्पन्न १५औँ महाधिवेशनले पार्टीको आन्तरिक लोकतन्त्र र संस्थागत प्रक्रियालाई थप सुदृढ बनाएको कांग्रेसको भनाइ छ । पार्टीको नेतृत्व र वैधानिकतामाथि अनावश्यक विवाद सिर्जना गर्नुको कुनै औचित्य नरहेको सचिवालयले जनाएको छ ।

सरकारका गतिविधिप्रति भने कांग्रेसले आफ्नो असन्तुष्टि कायमै राखेको छ । लोकतन्त्र, नागरिक स्वतन्त्रता, जनअधिकार र विधिको शासनका विषयमा सरकार जिम्मेवार हुनुपर्ने भन्दै लोकतान्त्रिक मूल्य र मान्यतामाथि प्रहार हुने कुनै पनि गतिविधिको प्रतिवाद गर्ने कांग्रेसले स्पष्ट पारेको छ ।

यसैबीच, बिचौलियासँग जोडिएका विभिन्न प्रकरणको अनुसन्धानलाई लिएर पनि कांग्रेसले आफ्नो धारणा सार्वजनिक गरेको छ । पार्टीले ती प्रकरणमा संलग्न जोकोही भए पनि निष्पक्ष र प्रमाणमा आधारित अनुसन्धान हुनुपर्ने तथा दोषी प्रमाणित हुने व्यक्तिलाई कानुनअनुसार कारबाही गर्नुपर्ने बताएको छ । यस विषयमा सरकारलाई आवश्यक सहयोग गर्न कांग्रेस तयार रहेको विज्ञप्तिमा उल्लेख छ ।

तर, अनुसन्धानका क्रममा रहेका विषयसँग सम्बन्धित नेपाल प्रहरीको छापसहितका कागजात, तथ्य तथा कथित बयानहरू छनोट गरेर सार्वजनिक गरिनुले अनुसन्धान प्रक्रियामाथि नै प्रश्न खडा गरेको कांग्रेसको ठहर छ । अनुसन्धानका संवेदनशील विवरणहरू छानिछानी बाहिर ल्याइनुले वास्तविक प्रमाण लुकाउने, नष्ट गर्ने वा अनुसन्धानलाई प्रभावित पार्ने प्रयास भइरहेको हो कि भन्ने आशङ्का पैदा भएको सचिवालयले जनाएको छ ।

कांग्रेसले अनुसन्धानको दायरा र प्रक्रिया सबैका लागि समान हुनुपर्नेमा समेत जोड दिएको छ । अनुसन्धानमा संलग्न निकायभित्रकै व्यक्तिहरूको भूमिकासमेत सार्वजनिक भइरहेका बेला कुनै व्यक्ति वा समूहलाई लक्षित गरेर अनुसन्धान अघि बढाइएको हो कि भन्ने प्रश्न उठ्नु स्वाभाविक भएको उसको भनाइ छ ।

पार्टीले अनुसन्धानका नाममा राजनीतिक प्रतिशोध साँध्ने, अपुष्ट सूचनाका आधारमा व्यक्तिको छवि बिगार्ने र पूर्वाग्रहपूर्ण ढङ्गले आरोप स्थापित गर्ने प्रयास स्वीकार्य नहुने जनाएको छ । अनुसन्धान निष्पक्ष, पारदर्शी र प्रमाणमुखी हुनुपर्ने कांग्रेसको अडान छ ।

यस विषयमा पार्टीको संसदीय दलले समेत अनुसन्धानलाई निष्पक्ष बनाउन आवश्यक निर्णय गरिसकेको सचिवालयले स्मरण गराएको छ । कांग्रेसले कुनै पनि प्रकरणको सत्यतथ्य बाहिर ल्याउन आफूहरू बाधक नबन्ने तर अनुसन्धानको आवरणमा राजनीतिक उद्देश्य पूरा गर्ने प्रयास भए त्यसको विरोध गर्ने संकेत गरेको छ ।

विज्ञप्तिको अन्त्यमा कांग्रेसले सञ्चारमाध्यम, राजनीतिक दल तथा सम्बन्धित सबै पक्षलाई अपुष्ट विवरणका आधारमा धारणा निर्माण नगर्न र प्रमाणित तथ्यका आधारमा मात्र विषय सार्वजनिक गर्न आग्रह गरेको छ । साथै, आमनागरिकलाई सामाजिक सञ्जालमा फैलिने अपुष्ट सूचना र भ्रामक प्रचारबाट प्रभावित नहुन पनि अनुरोध गरेको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

जनताले नेकपालाई दिएको मतको वैधता सकियो : गगन थापा

विश्वभरबाट आउनै लागेको खोप ‘नालायक’ प्रधानमन्त्रीका हर्कतले रोकियो, गगन थापाको खुलासा

सिसीटिभी फुटेज मेटाउने अर्थमन्त्रीमाथि खनिए गगन, घोक्राएर निकाल्नुपर्ने माग!

लथालिंग भातृसंस्थाबारे महामन्त्री थापाले दिए यस्तो अभिव्यक्ति, देशैभर उत्साहको संचार 

काठमाडौं बासीका पक्षमा गगनले दिए यस्तो अभिव्यक्ति, चौतर्फी खुसियाली

गगनले गरे यस्तो घोषणा, चौतर्फी खुसियाली