काठमाडौं - नक्कली शरणार्थी प्रकरणमा एमालेका निलम्बित सचिव टोपबहादुर रायमाझी पक्राउ परेका छन् ।

नेपालीलाई भुटानी शरणार्थी बनाएर अमेरिका लैजाने ठगीकाण्डमा रायमाझीको संलग्नता देखिएपछि प्रहरीले उनको खोजी गरेको थियो ।

वैशाख २० गते छोरा सन्दीप पक्राउ परेपछि फरार रहेका रायमाझी शुक्रबार भारतको नयाँ दिल्लीबाट पोखरा हुँदै आइतबार काठमाडौं आएर लुकिरहेको अवस्थामा पक्राउ परेका हुन् ।

शरणार्थी प्रकरणमा अब एमाले उपाध्यक्ष रामबहादुर थापा बादलका छोरा प्रतीक र इन्द्रजित राईका छोरा निरज फरार छन् । बादलका छोरा प्रतीकको ठगीमा संलग्नता पुष्टि भइसकेको छ ।

प्रहरीले शुक्रबार उनीविरुद्ध पक्राउ पुर्जी जारी गरेको थियो । त्यसको सुइँको पाएपछि प्रतीक फरार भएका थिए । बादलको हकमा स्वतन्त्र प्रमाण स्थापित भइनसकेको प्रहरीले जनाएको छ ।

तर, गत मंगलबार पक्राउ परेका रामशरण केसीको बयानबाट उनको संलग्नता पुष्टि गर्न सकिने प्रहरीको आशा छ । सानु भण्डारीले जस्तै केसीले पनि प्रतीकलाई पैसा बुझाएको बताएका छन् ।

दुवैको बयानमा प्रतीकको सहयोगबारे एउटै विवरण आएपछि उनको संलग्नतामा प्रहरी विश्वस्त भएको हो । बाबुकै सहमतिमा प्रतीकले रकम बुझेको हुन सक्ने आशंका छ ।

बादल गृहमन्त्री हुँदा प्रतीक स्वकीय सचिव थिए । बिचौलियासँग पैसा उठाउने प्रतीक नै देखिएपछि अनुसन्धानको तिर बादलतिर सोझिएको छ । त्यसैले अब बादललाई पनि अनुसन्धानको घेरामा प्रहरीले राखेको छ ।

बादल गृहमन्त्री हुँदा बिचौलियाको स्वार्थअनुसार भुटानी शरणार्थीसम्बन्धी समस्याको स्थायी समाधानका लागि २०७६ जेठ ३० गते कार्यदल गठन भएको थियो । कार्यदल गठन गरेलगत्तै त्यसैलाई देखाएर बिचौलिया समूहले करोडौँ पैसा उठाएको थियो ।

कार्यदल गठनको औचित्यमै प्रश्न उठेको छ । बादल गृहमन्त्री हुँदा उनका सुरक्षा सल्लाहकार रहेका इन्द्रजित राईले साढे पाँच करोड लिएको प्रमाण भेटिएका छन् । ‘मन्त्रीलगायतलाई मिलाउन’ भन्दै उनले पैसा उठाएका थिए ।

बादलले सल्लाहकारकै सल्लाहअनुसार कार्यदल गठन गर्नु, अर्कोतर्फ छोरासमेतको मिलेमतो देखिएपछि बादलमाथि अनुसन्धान सोझिएको प्रहरीको भनाइ छ ।

गृह मन्त्रालयका त्यतिवेलाका सचिव प्रेमकुमार राई र महेश्वर न्यौपानेले पनि आफूहरूलाई सघाएको बिचौलियाको बयान छ । तर, बलियो प्रमाण भने भेटिएको छैन ।

प्रहरीले बादल, उनका छोरा प्रतीक र निरज राईलाई पक्राउ गर्न सके शरणार्थी प्रकरण टुंगामा पुग्ने अनुमान गरेको छ । तर अदालतले चार दिनभित्र शरणार्थी प्रकरणको अनुसन्धान सकेर मुद्दा चलाउन समय दिएपछि प्रहरीलाई सकस परेको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

गृहमन्त्री थापाका स्वकीय सचिवको गाडीले स्कूटरलाई दियो ठक्कर, कस्तो छ अबस्था ?

प्रचण्डसँगको टसल बादललाई पर्ने भो भारी, गृहमन्त्रीको कुर्सी संकटमा

गृहमन्त्री बादलकै कारण मन्त्रिपरिषद् पुनर्गठनमा ढिलाइ, यसरी परे ओली र प्रचण्डको तानातानमा

कांग्रेसका भक्तपुर जिल्ला सभापतिलाई पितृशोक, कांग्रेसद्धारा दुख व्यक्त

 युरोपेली संघलाई गृहमन्त्रीको यस्तो आग्रह

जनता सरकार खोज्दै, सरकार भिटेन खोज्दै