काठमाडौं - नेपाली कांग्रेसले तनहुँ १ लाई प्रतिष्ठाको विषय बनाएको छ । कांग्रेसको राम्रो पकड भएको तथा राष्ट्रपति रामचन्द्र पौडेलको निर्वाचन क्षेत्र भएकाले पनि तनहुँ १ कांग्रेसको मुख्य प्राथमिकतामा परेको हो ।

सोही कारण अहिले कांग्रेसका प्रभावशाली नेताहरू तनहुँ १ पुगेर उम्मेदवार गोविन्द भट्टराईसँग मत माग्नेक्रम तीव्र पारिएको छ । बारा २ मा आफ्नो उम्मेदवार नभएको र चितवन २ मा गुमेको साख फिर्ता हुने सम्भावना देखिएपछि कांग्रेसले तनहुँ १ लाई जित्ने गरी प्रतिष्ठाको विषय बनाएको हो ।

यसअघि राष्ट्रपति रामवरण यादवको निर्वाचन क्षेत्र धनुषा ४ को उपनिर्वाचनमा कांग्रेसका उम्मेदवार चन्द्रमोहन यादव पराजित भएको इतिहास रहेकाले अहिले कांग्रेसले पूरै ध्यान तनहुँ १ मा केन्द्रित गरेको हो । कांग्रेसले महामन्त्री गगन थापालाई तनहुँ १ मा चुनावी कमान्डर बनाएको छ ।

केही अघिसम्म कांग्रेसमै रहेका स्वर्णिम वाग्ले राष्ट्रिय स्वतन्त्र पार्टी प्रवेश गरी तनहुँ १ मा उम्मेदवार बनेपछि कांग्रेसले महामन्त्री थापालाई कमान्डर बनाएको हो । पार्टी सभापति शेरबहादुर देउवाले अहिले थापाको परीक्षण लिइरहेका छन् ।

उम्मेदवारी दर्ता गरेदेखि नै थापा भट्टराईलाई जिताउन विभिन्न रणनीतिमा लागेका छन् । उनी हाल काठमाडौंमा भए पनि तनहुँका प्रभाव पार्न सक्ने नेताहरूसँग उनको भेटघाट जारी छ । कांग्रेस केन्द्रीय सदस्य शंकर भण्डारी तनहुँ १ मै अड्डा जमाएर बसेका छन् ।

उनी तनहुँ २ मबाट विजयी भएका हुन् । पहिले भण्डारीले तनहुँ १ बाटै चुनाव जितेका थिए । यसपटक पौडेल १ बाट उठेपछि शंकर २ नम्बर क्षेत्रमा पुगेका हुन् ।

कांग्रेसका अर्का महामन्त्री विश्वप्रकाश शर्मा पनि तनहुँमा भट्टराईको पक्षमा माहोल बनाउन पुगेका छन् । उनले तनहुँ १ का विभिन्न स्थानमा आयोजित चुनावी सभालाई सम्बोधन गरेका थिए ।

शर्मा तनहुँ कांग्रेसमा लोकप्रिय छन् । कांग्रेस नेता एवं सांसद प्रदीप पौडेल पनि तनहुँ १ मा पुगेका छन् । उनी मंगलबार नै तनहुँ पुगेर घरघरमा भट्टराईलाई भोट माग्न व्यस्त छन् । पौडेलको गृहजिल्ला भएकाले तनहुँमा उनको राम्रो प्रभाव छ ।

त्यस्तै, कांग्रेसका प्रभावशाली नेता प्रकाशमान सिंहले सत्ता गठबन्धनका साझा उम्मेदवार गोविन्द भट्टराईलाई अत्यधिक मतका साथ जिताउन आग्रह गरेका छन् ।

बुधबार बिहान तनहुँमा आयोजित चुनावी सभालाई सम्बोधन गर्दै नेता सिंहले भट्टराई निष्ठावान र इमान्दार नेता भएकाले तनहुँले न्याय गर्नुपर्न बताए ।

उनले कांग्रेसले तनहुँलाई सरकार बनाउँदा होस् वा राज्यको प्रमुख तहमा स्थान दिएको स्मरण गराउँदै भने, ‘उहाँलाई अत्यधिक मतले विजयी गराउनुस् । मन्त्रीपरिषद् विस्तार हुँदा उहाँ मन्त्री नबन्नुहोला भन्ने के छ र ?’ नेता सिंह सेड्युल बनाएरै चुनावी प्रचारमा लागेका छन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

रामचन्द्रको क्षेत्रमा गोविन्द भट्टराई उम्मेदवार, देउवाले दिए जितको शुभकामना  

तनहुँ–१ मा कांग्रेसले गोविन्द भट्टराईलाई उम्मेदवार बनाउने 

तनहुँ–२ मा भट्टराईलाई उम्मेदवार बनाउने कांग्रेसको निर्णय

गोविन्द भट्टराईले गराए उम्मेदवारी दर्ता 

गोविन्द भट्टराईलाई सघाउने पाँच दलको निर्णय

स्वर्णिम वाग्लेले गोविन्द भट्टराई बारे फैलाए अपवाह, झुटैझुट बोल्न थाले