गोविन्दराज जोशीलाई कांग्रेसको पूर्वपदाधिकारीको वरीयता

मिडिया डबली

सोमवार, चैत्र २० २०७९

6.3K

गोविन्दराज जोशीलाई कांग्रेसको पूर्वपदाधिकारीको वरीयता

काठमाडौं– नेपाली कांगेसले तनहुँका गोविन्दराज जोशीमाथिको कारबाही फुकुवा गरेसँगै उनी अब पूर्वसहमहामन्त्रीको हैसियतमा रहने भएका छन् । तनहुँ २ मा अघिल्ला दुई निर्वाचनमा कांग्रेसकै आधिकारिक उम्मेदवारविरुद्ध बागी दिएका जोशीलाई पार्टीले अनुशासनको कारबाही गरेपछि उनको पूर्वपदाधिकारीको वरीयता खोसिएको थियो । तर आइतबार बसेको कांग्रेस केन्द्रीय कार्यसम्पादन समितिको बैठकले उनको कारबाही फुकुवा गरेको छ ।

तर कांग्रेसले कारबाही फुकुवा गरे पनि जोशीले अस्वीकार गरेका छन् । उनले आफू कांग्रेस नै नभएको भन्दै अस्वीकार गरेका हुन् । यद्यपि जोशीले तनहुँ २ मा आफ्नो समूहले उपनिर्वाचनमा उम्मेदवार नउठाउने र तठस्थ बस्ने निर्णय गरेका छन् । तनहुँ २ मा कांग्रेसले केन्द्रीय सदस्य गोविन्द भट्टराईलाई उम्मेदवार बनाएसँगै जोशीले यसपटक आफ्नो समूह चुनाव नलड्ने, तठस्थ बस्ने निर्णय गरेको हो ।

जोशी कांग्रेसका पूर्वसहमहामन्त्री हुन् । कांग्रेसबाट गृह र शिक्षामन्त्री भइसकेका जोशीकै पहलमा अहिले सानेपामा रहेको केन्द्रीय कार्यालय निर्माण भएको हो । जोशीको तनहुँ २ मा सात हजारभन्दा बढी भोट छ । कांग्रेसले कारबाही फुकुवा गरिसकेकाले अब उनलाई पार्टीमा पूर्वपदाधिकारीको हैसियतमा बैठकमा भाग लिन बाटो खुलेको छ । आफूमाथि भएको अन्याय पार्टीका फोरममा राख्ने अवसर खुलेको छ । तनहुँवासी जोशीलाई कारबाही गरेर ठूलो अन्याय गरेकोमा सहमत छ । जोशीका प्रतिस्पर्धी नेता रामचन्द्र पौडेल राष्ट्रपति निर्वाचित भइसकेकाले पनि अब उनले तनहुँमा कांग्रेसलाई घाटा हुने राजनीति गर्ने छैनन् भन्नेमा धेरै आशावादी देखिएका छन् ।

मंसिर ४ गते सम्पन्न निर्वाचनमा कांग्रेसका रामचन्द्र पौडेलले २५ हजार मत ल्याएका थिए । जोशीले ६ हजारभन्दा बढी मत ल्याएका थिए । यदि अहिले जोशीले आफ्नो मत कांग्रेसको पक्षमा खसाल्ने वातावरण बनाइदिएमा कांग्रेस उम्मेदवार गोविन्द भट्टराईले ३० हजार मत ल्याउने र त्यो जितका लागि पर्याप्त हुने नेताहरु बताउँछन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि