काठमाडौं – सर्वाेच्च अदालतका प्रधानन्यायाधीश चोलन्द्रशम्शेर राणाको राजीनामा माग गर्दै नेपाल बार एशोसिएशनको अगुवाइमा आन्दोलनमा उत्रिएका कानून व्यवसायीले बिहीवार सर्वोच्च अदालत परिसरभित्रै अराजक हिसाबले नाराजुलुस गरेका छन् ।

न्यायपालिकाको इतिहासमा सर्वोच्च अदालत परिसरभित्रै प्रधानन्यायाधीशविरुद्ध अराजक ढंगले नारा–जुलुस भएको सायदै पहिलो पटक हो ।

नेपाल बारका पूर्व पदाधिकारी, वर्तमान पदाधिकारी, वरिष्ठ अधिवक्ताहरु सम्मिलित विरोध कार्यक्रममा उत्तेजित नारा लगाइएका छन् । कानूनका ज्ञाताहरु नै सर्वोच्च अदालत परिसरमा संयमित बन्न सकेको देखिएन ।

प्रधानन्यायाधीश राणाको राजीनामा माग्दै नेपाल बारले दोस्रो चरणको आन्दोलन थालेको छ । राजीनामा माग राखेर कालोपट्टीसहित नेपाल बारको प्राङ्गणमा धर्ना दिँदै आएका कानून व्यवसायी बिहीवार सर्वोच्च अदालत परिसर पुगेका छन् ।

सर्वोच्च अदालतभित्रै माइक राखेर विरोध कार्यक्रम गर्ने तयारी गरिरहेका कानून व्यवसायीलाई सुरक्षाकर्मीले संवेदनशील स्थान भएकाले भित्र कार्यक्रम नगरिदिन आग्रह गरे । सुरूमा ५ जना सुरक्षाकर्मीले रोकेकाले माइक राखेर कार्यक्रम गर्न नपाउँदा उपस्थित कानून व्यवसायी आक्रोशित बने ।

सुरक्षाकर्मी र आन्दोलनकारी कानून व्यवसायीबीच धकेलाधकेल समेत भएको छ । त्यसपछि आक्रोशित बनेका कानून व्यवसायीले प्रधानन्यायाधीश राणाविरुद्ध अमर्यादित नारा लगाएका छन् ।

नेपाल बार एशोसिशनका अध्यक्ष चण्डेश्वर श्रेष्ठ, सर्वोच्च अदालत बारका अध्यक्ष पूर्णमान शाक्यलगायत वरिष्ठ अधिवक्तादेखि अधिवक्तासम्म नाराबाजीमा सहभागी भएका थिए ।

बारका अध्यक्ष श्रेष्ठ लगायतलाई सर्वोच्च प्रशासनले अदालतभित्र नाराबाजी नगरिदिन आग्रह गर्‍यो । सर्वोच्च अदालतका मुख्य रजिस्ट्रार लालबहादुर कुवँरले बारका अध्यक्षलाई आन्दोलनमा संयम र धैर्य नगुमाइदिन आग्रह गरेका थिए ।

सर्वोच्च प्रशासनले बार एशोसिएशनले भद्र्र सहमति तोड्दै नियोजित हिसाबले जबरजस्ती अदालतभित्रै नाराजुलुस गरेकोमा असन्तुष्टि जनाएको छ । बिहीवार भएको घटनामा सर्वोच्च प्रशासन र सुरक्षाकर्मीमाथि दोष लगाउनु गलत भएको सर्वोच्च अदालतका प्रवक्ता बाबुराम दाहालले जानकारी दिए ।

दाहालले भने, ‘बारका पदाधिकारी सीमा नाघेर मर्यादाविपरीत उत्रिनु गलत हो । आफ्नो पदीय मर्यादा, उत्तरदायित्व, सामाजिक अवस्था बिर्सेर जे पायो त्यही नारा लगाउनु ठीक होइन । प्रशासनले विरोध कार्यक्रम गर्न पाइँदैन भनेको होइन । विरोध गर्न,आफ्ना कुरा राख्न पाइन्छ । उहाँहरु बौद्धिक वर्ग हुनुहुन्छ, संयमित भएर निषेधित क्षेत्रमा नभई सीमित एरियामा रहेर आन्दोलन गर्न आग्रह गरिएको हो ।’

कानून व्यवसायीमाथि सुरक्षाकर्मीबाट आक्रमण नभएको र सञ्चारमाध्यममा आएका भिडियो हेर्दा पनि त्यस्तो नभएको थाहा हुने दाहालले बताएका छन् ।

नेपाल बार एशोसिएशनका महासचिव लीलामणि पौडेलले विज्ञप्तिमार्फत न्यायपालिकाका विकृति, विसंगति हटाउन प्रधानन्यायाधीशको राजीनामा माग राखेर शान्तिपूर्ण विरोध कार्यक्रम गरिरहेका कानून व्यवसायीमाथि बिचौलिया र भिजिलान्ते लगाएर आन्दोलन तुहाउने प्रयास भएको आरोप लगाए । आजको नागरिक दैनिकमा समाचार प्रकाशित छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

केपी र विद्याको कदमबारे सर्वाेच्च अदालतले दिइएको ५ बुँदे आदेशमा के छ ? (पूर्णपाठ)

प्रचण्ड–माधवले मात्रै होइन ओलीलाई सर्वाेच्च अदालतले पनि दपेट्यो

सरकारविरुद्धको मुद्दा सर्वाेच्चले किन राख्यो हेर्न नभ्याइनेमा ?

ओली सरकारका नयाँ मन्त्रीबारे सर्वाेच्च अदालतबाट यस्तो आदेश

केपी ओलीसँग ‘स्वार्थ’ बाझिने न्यायाधीश नै सर्वाेच्चको इजलाशमा बसेपछि ...

सर्वाेच्च अदालतका न्यायाधीशको यस्तो कुरा सुनेपछि महिला वरिष्ठ अधिवक्ताको आपत्ति