पाकिस्तानमा महिला भएर जन्मिनु भनेको स्वतन्त्र व्यक्तिको हैसियत होइन, नियन्त्रणको वस्तु बन्नु हो। घरभित्रका हिंसादेखि सडकमा हुने हमला, कार्यस्थलदेखि इन्टरनेटसम्म यत्रतत्र जोखिम। राज्य र समाज दुवैले महिलालाई सुरक्षा होइन, मौनता अपेक्षा गर्छन्। जब एक देशको आधा जनसंख्या बच्नकै लागि लड्न बाध्य हुन्छ, त्यो राष्ट्र कत्तिको स्वस्थ छ भन्ने प्रश्न उठ्छ।

सामाजिक र धार्मिक संरचनाले महिलालाई दोस्रो दर्जाको जीवन दिन्छ। हत्या, बलात्कार, घरेलु हिंसा, बालविवाह, सम्मान हत्या जस्ता अपराध बढिरहेको छ तर कानून र सरकार मौन छन्। पीडित महिला प्रमाण दिन बाध्य हुन्छिन् तर अपराधीलाई समाजले संरक्षण गर्छ। राज्यका कानुनहरू पुस्तिकामा मात्र शक्तिशाली छन्, व्यवहारमा महिलाको सुरक्षामा शून्य प्रभाव देखिन्छ। प्रहरी प्रसासनले प्रायः पीडितलाई नै दोषी ठहर गर्ने प्रवृत्ति देखाउँछ, जसले न्यायसम्पादनको मार्ग बन्द गरिदिन्छ।

पत्रकारिता र सामाजिक सक्रियता गर्ने महिलाहरू झनै जोखिममा छन्। आफ्नो आवाज उठाउनेबित्तिकै उनीहरू राज्यका नजरमा खतरनाक बन्छन्। पत्रकार, लेखक, मानवअधिकारकर्मी महिला मात्र होइन, साधारण कामकाजी महिलासमेत दैनन्दिन हिंसाका शिकार भइरहेछन्। सडकमा हिड्दा, सार्वजनिक यातायात प्रयोग गर्दा, कार्यालयमा काम गर्दा — कतै पनि सुरक्षा छैन। यस्तो अवस्थामा पाकिस्तानमा महिला अधिकारको कुरा गर्नु विडम्बना नै हो।

आर्थिक अवसरहरू पनि सीमित छन्। यदि महिलाले जागिर पाइन् भने पनि सामाजिक बदनाम, पारिवारिक बन्देज र कार्यस्थलमा हुने यौन दुव्र्यवहारले उनलाई आत्मनिर्भर बन्नै नदिने वातावरण बनाउँछ। योग्यता र कडा मेहनतले होइन, परिवार र समाजले तोकेको सीमाले महिलाको भविष्य निर्धारण गरिदिन्छ। सरकारी नीतिहरूमा पनि लैङ्गिक न्यायको भावना मात्र भाषणमा सीमित हुन्छ। शासन संरचना महिलालाई असुरक्षित बनाउनेहरूकै पक्षमा उभिन्छ।

अन्ततः प्रश्न उँहीँ छ — पाकिस्तानमा महिला हुनु अपराध हो कि भाग्य?

यदि जन्मिने बित्तिकै जीवनमाथि नियन्त्रणको शृंखला कसिने हो भने, त्यो समाज अझै बीसौं शताब्दीको अँध्यारो संस्कारमै खुसी छ भन्ने प्रतिविम्ब हो। सुरक्षा, समानता, सम्मान — यी कुनै दान होइनन्, मानव भएर जन्मिएको प्रत्येक व्यक्तिको आधारभूत अधिकार हुन्। तर पाकिस्तानमा यी अधिकार माग्नु नै अपराध जस्तो व्यवहार हुन्छ। जबसम्म राज्य र समाजले महिलालाई पूर्ण नागरिकको हैसियत मान्दैन, तबसम्म पाकिस्तानले आधुनिक राष्ट्रको दर्जा पाउने दाबी गर्नु नै प्रहसन हुनेछ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।