पछिल्ला दिनहरूमा भारतले पाकिस्तानमा अवस्थित आतङ्कवादी पूर्वाधारहरूबारे विश्वसमुदायलाई गम्भीर रूपमा सतर्क गराउँदै आएको छ। अपरेशन सिन्दूरपछि भारतले विभिन्न अन्तर्राष्ट्रिय मञ्चहरूमा पाकिस्तानको भूमिमा सक्रिय रहेका आतङ्कवादी संगठनहरू र तिनको संरक्षण गर्ने राज्य संरचनाको विषयमा तथ्यसहितको प्रस्तुति गर्दै आएको छ। भारतको कूटनीतिक र रणनीतिक सक्रियताले पाकिस्तानलाई पुनः FATF को ग्रे लिस्टमा राख्न अन्तर्राष्ट्रिय दवाब सिर्जना गरेको छ।

भारतको सर्वदलीय संसदीय प्रतिनिधिमण्डलले कंगो, स्लोभेनिया, कुवेत, कतार, फ्रान्स, इटाली, दक्षिण कोरिया, नेपाल र अन्य मुलुकमा प्रत्यक्ष भेटघाटमार्फत पाकिस्तानको आतङ्कवादी संरचनाबारे जानकारी गराएको छ। कतिपय देशका सांसद र मन्त्रीहरूले भारतको “शून्य सहनशीलता” नीतिप्रति ऐक्यबद्धता जनाएका छन् भने केहीले खुल्ला रूपमा पाकिस्तानको आलोचना गरेका छन्। जस्तै, स्लोभेनियाका एक वरिष्ठ कूटनीतिज्ञले पाकिस्तानले IMF का ऋण आतंकवादमा प्रयोग गर्न सक्ने चिन्ता सार्वजनिकरूपमा व्यक्त गरेका छन्।

यसै क्रममा प्रकाशित भएका रिपोर्टहरू, जस्तै MEMRI को विश्लेषण अनुसार पाकिस्तान र पाक-अधिकृत कश्मीरमा कम्तीमा ९ वटा आतंकवादी तालिम केन्द्रहरू सक्रिय रूपमा सञ्चालनमा रहेका छन्। भारतको आरोप छ कि यी केन्द्रहरूबाट भारतका नागरिक क्षेत्रहरूमा आक्रमण गर्ने रणनीति बनाइन्छ र पाकिस्तान सरकारले प्रत्यक्ष वा परोक्षरूपमा यिनीहरूलाई संरक्षण गर्छ।

यसैबिच, कांग्रेस सांसद शशि थरूरले गयाना भ्रमणका क्रममा पाकिस्तानद्वारा नागरिक हत्याको निन्दा गर्दै भने, “पाकिस्तानले अब वैश्विक दण्डहीनताको सुविधा लिने अवस्था सकिनु पर्छ।” अन्य सांसदहरूले पनि पाकिस्तानले मात्र आतङ्क फैलाइरहेको नभई अन्तर्राष्ट्रिय नियमहरूको उल्लंघन गरिरहेको दाबी गरेका छन्।

सन् २०२५ को मे महिनाभरि भारतको यस कूटनीतिक आक्रमकताले पाकिस्तानको विश्व छविमा थप गिरावट ल्याएको छ। FATF सम्बन्धी छलफल पुनः तीव्र भएको छ र कतिपय मुलुकहरूले पाकिस्तानको आतंक सम्बन्धी फाइल पुनः खोल्न आग्रह गरेका छन्। पाकिस्तानले जति नै डिनायल मोड अपनाए पनि, भारतले प्रस्तुत गरेका प्रमाण र रणनीतिक संवादले अन्तर्राष्ट्रिय जगतलाई गम्भीर सोचमा डुबाएको छ।

यसैक्रममा, इजरायल, मंगोलिया, दक्षिण अफ्रिका, र ASEAN जस्ता विविध क्षेत्रीय समूहहरूसँग पनि भारतले आतङ्कवादविरुद्ध सहकार्य विस्तार गरेको छ। यो स्पष्ट संकेत हो कि भारत अब आतङ्कवादको विषयमा केवल ‘दुईपक्षीय’ प्रतिक्रिया होइन, ‘बहुपक्षीय रणनीति’ अपनाउँदै छ।

समग्रमा पाकिस्तानमा सञ्चालित आतङ्कवादी संरचनाहरू अब केवल भारतका लागि मात्र चुनौती नभई सम्पूर्ण विश्वका लागि अस्थिरताको कारक बनिरहेका छन् भन्ने भारतको चिन्तालाई धेरै मुलुकहरूले साझा गर्न थालेका छन्। यदि अन्तर्राष्ट्रिय समुदायले अहिले चासो दिएन भने, भोलिको सुरक्षा चुनौती अझ भयावह हुन सक्छ भन्ने चेतावनी भारतले सबैसँग बाँडेको छ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।