भारत–पाकिस्तानबीच दशकौं पुरानो कश्मीर विवाद पछिल्लो समय पुनः तनावपूर्ण चरणमा पुगेको छ। वैशाख १० गते भारतको पहलगाममा २६ जना हिन्दू पर्यटकको ज्यान लिने आतङ्कवादी आक्रमणपछि भारतले सीमा पार मिसाइल आक्रमण गर्दै प्रतिकार गर्‍यो। तर अहिले चिन्ताजनक कुरा के देखिएको छ भने पाकिस्तानका आतङ्ककारी संगठनहरूले हमासको रणनीति अनुकरण गर्दै भारतविरुद्ध आतङ्क फैलाउने नयाँ र खतरनाक मोड अपनाएका छन्।

पछिल्लो केही वर्षयता हमास र पाकिस्तानको सैन्य गुप्तचर संस्था (आईएसआई)बीच सम्बन्ध गहिरिँदै गएको छ। २०८० असोज २१ मा इजरायलमा हमासद्वारा गरिएको 'अल अक्सा फ्लड' आक्रमणपछि इस्लामिक विश्वका चरमपन्थीहरूमा हमासप्रति सहानुभूति बढेको थियो। यिनै घटनाहरूले पाकिस्तानका आतङ्ककारी समूहहरूलाई हमासको रणनीति अपनाएर भारतमा आतंक फैलाउने हौसला दिएको देखिन्छ।

फेब्रुअरी २०८१ मा पाकिस्तानअधिकृत कश्मीरमा आयोजित “कश्मीर सॉलिडारिटी डे” तथा “हमास अपरेशन अल अक्सा फ्लड कन्फरेन्स” मा हमासका प्रवक्ता खालिद कादुमी र नेता जहीर नाजीले समेत सहभागी भई भारतविरोधी भाषण दिएका थिए। सम्मेलनमा जैश–ए–मोहम्मद (जेइएम), जम्मु कश्मीर युनाइटेड मुभमेन्ट लगायतका आतङ्ककारी समूहहरूको पनि सहआयोजन थियो।

त्यसको केही समयमै 'द रेसिस्टेन्स फ्रन्ट' (टीआरएफ) ले पहलगाम आक्रमण गर्‍यो। लश्कर–ए–तैयबा (एलइटी) को नजिकको समूह मानिने टीआरएफले हिन्दू पर्यटकहरूलाई लक्षित गर्दै हमासको शैलीमा भिडिओ खिच्दै, केहीलाई इस्लामिक आयत वाचन गर्न बाध्य पार्दै र भारतलाई धम्की दिने काम गरेको थियो।

पाकिस्तानको यस्तो चरमपन्थी गतिविधिमा संलग्नता दिनप्रतिदिन बढ्दो देखिन्छ। केही प्रतिवेदन अनुसार, पाकिस्तानले हमासका उच्च नेताहरूलाई संरक्षण दिने, बदला स्वरूप वित्तीय तथा रणनीतिक लाभ प्राप्त गर्ने र उनीहरूबाट जेइएम, एलइटी जस्ता समूहहरूलाई रणनीतिक तालिम दिने काम गरिरहेको छ। पाकिस्तानको यो रणनीति जम्मु–कश्मीरमा धार्मिक घृणालाई झनै उचाल्ने कार्यमा रूपान्तरण भइरहेको छ।

पाकिस्तानी सेनाप्रमुख जनरल असीम मुनीरले आक्रमण हुनु एक हप्ता अघि हिन्दूहरू विरुद्ध आपत्तिजनक अभिव्यक्ति दिएका थिए। विश्लेषकहरूका अनुसार मुनीरको उक्त अभिव्यक्ति सुनियोजित थियो, जसको उद्देश्य भारतलाई उक्साएर सशस्त्र संघर्षमा धकेल्नु थियो—ताकि पाकिस्तानको आन्तरिक असफलता र आर्थिक संकटबाट जनताको ध्यान मोड्न सकियोस्।

यसरी पाकिस्तानले इजरायल–हमास द्वन्द्व र कश्मीर विवादलाई एकआपसमा जोडेर अन्तर्राष्ट्रिय मुस्लिम समुदायको सहानुभूति जित्न खोजे पनि हालसम्म यो रणनीति असफल हुँदै आएको छ। तर हालको पहलगाम आक्रमण, हमास शैलीमा गरिएको प्रचार र हिंसा, र पाकिस्तानबाट पाएको संरक्षणले अब यो क्षेत्रीय द्वन्द्व मात्रै नभई, एक अन्तर्राष्ट्रिय आतङ्ककारी सञ्जालको हिस्सा बन्ने खतरा बढेको छ।

अन्तर्राष्ट्रिय समुदायले पाकिस्तानका सैन्य–राजनीतिक नेतृत्वद्वारा प्रयोग गरिँदै आएको यो आतङ्ककारी रणनीतिको भर्त्सना गर्नु अत्यावश्यक छ। अन्यथा, यसले न केवल दक्षिण एशियामा, तर सम्पूर्ण विश्वमा शान्ति र सुरक्षामा दीर्घकालीन असर पार्नेछ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।