२०८२ वैशाख २५ गते प्रकाशित एक धारणा लेखमा अमेरिकी लेखक तथा राजनीतिक विश्लेषक डेनियल ग्रिनफिल्डले भारतले पाकिस्तानमा गरेको सैन्य कारबाही पूर्णतः जायज र आवश्यक रहेको बताएका छन्। उनले भनेका छन्, "भारतले पटक–पटक इस्लामिक आतङ्कवादी आक्रमण भोगिरहेको थियो, जुन पाकिस्तान सरकारसँग सम्बद्ध समूहद्वारा प्रेरित थिए। यस्तो अवस्थामा भारतको कारबाही संयमित, उद्देश्यपरक र आवश्यक थियो।"

ग्रिनफिल्डले अमेरिकी राजनीतिज्ञहरूलाई भारतको साथमा उभिन आग्रह गरेका छन्। "भारत वा इजरायलले आतङ्कवादी समूहविरुद्ध कारबाही गर्दा पश्चिमी मिडिया र केही नेताहरूले दोष दुवै पक्षलाई दिन्छन्," उनले लेखमा उल्लेख गरेका छन्, "तर वास्तविकता के हो भने—भारतले आतंकको विरुद्ध सन्देश दिनुपर्ने स्थिति थियो, र उसले त्यही गरेको हो।"

उनले पाकिस्तानको भूमिमा ओसामा बिन लादेनदेखि लिएर अन्य विभिन्न इस्लामिक आतङ्कवादीको संरक्षण हुँदै आएको कुरालाई स्मरण गराउँदै पाकिस्तान सरकार आफैंलाई ‘आतङ्कवादी संरक्षक राज्य’को रूपमा चित्रण गरेका छन्। साथै, उनले ‘आतङ्कवादीले आफूलाई पीडित देखाउने नाटकमा माहिर’ भएको भन्दै अन्तर्राष्ट्रिय समुदायलाई त्यस्ता भ्रमबाट सचेत रहन आह्वान गरेका छन्।

ग्रिनफिल्डले भारतको कारबाहीले विश्वयुद्ध निम्त्याउने संकेत होइन भन्दै, "रुस–युक्रेन युद्ध पनि विश्वयुद्ध थिएन। त्यसैले हरेक सैन्य प्रतिक्रियामा 'विश्वयुद्ध सुरु हुँदैछ' भन्ने हल्लालाई आधार मान्नु हुन्न," भन्दै डर सिर्जना गर्न खोज्ने तत्वप्रति चेतावनी दिएका छन्।

उनको निष्कर्ष स्पष्ट छ: "अमेरिकी राजनीतिज्ञहरू आतङ्कवादको विरोधमा स्पष्ट रूपमा उभिनुपर्छ। भारतजस्ता लोकतान्त्रिक देशहरूप्रति समर्थन जनाउनुपर्छ, न कि इस्लामिक चरमपन्थीहरूप्रति सहानुभूति राख्ने पुरानो प्रवृत्ति दोहोर्याउन।"

ग्रिनफिल्डको यो लेखले भारतको पछिल्लो सैन्य कारबाहीप्रति अमेरिकी बौद्धिक समुदायभित्रको समर्थनको आवाजलाई थप बल दिएको छ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।