चीनमा २०२४ को अन्त्यतिर हिंसात्मक घटनाहरूको श्रृंखलाले गहिरो सामाजिक संकट उजागर गरेको छ। नोभेम्बर ११ मा झुहाईमा एक ६२ वर्षीय व्यक्तिले डिभोर्स पछि मानसिक तनावका कारण गाडी ठोक्याउँदा ३५ जनाको मृत्यु र ४३ जना गम्भीर घाइते भए। पाँच दिनपछि वुशीमा एक विद्यार्थीले ग्राजुएसन प्रमाणपत्र नपाएको र परीक्षामा असफल भएको झोंकमा चक्कु प्रहार गरी आठ जनाको ज्यान लियो र १७ जना घाइते भए।

यो केवल सतहमा देखिएको समस्या हो। यस वर्षको अक्टोबरमा बेइजिङको एक प्राथमिक विद्यालय नजिक चक्कु प्रहारको घटना, सेप्टेम्बरमा शाङ्हाई र शेन्जेनमा भएका हिंसात्मक घटनाहरू, र गर्मी महिनामा विभिन्न प्रान्तहरूमा गाडी आक्रमण र चक्कु प्रहारका घटनाहरूले चिनियाँ समाजमा गहिरो असन्तुलनको संकेत गरेका छन्।

यी हिंसात्मक घटनाहरू प्रायः समाजबाट अलग गरिएका, असन्तुष्ट, वा प्रणालीबाट ठगिएका व्यक्तिहरूले गरेका पाइन्छ। ग्वाङ्झाउमा ऋणमा डुबेका एक व्यक्तिले गाडी आक्रमण गरी आफ्नो निराशा पोखेका थिए भने शाङ्हाईमा आर्थिक विवादका कारण एक व्यक्तिले चक्कु आक्रमण गरेका थिए। यी व्यक्तिगत गुनासाहरू सार्वजनिक हिंसामा परिणत हुनु, चिनियाँ समाजमा परम्परागत विवाद समाधानका विधिहरू असफल हुँदै गएको देखिन्छ।

चिनियाँ कम्युनिस्ट पार्टीको प्रतिक्रिया नियमन र निगरानीलाई सुदृढ गर्ने दिशामा केन्द्रित छ। झुहाई घटनापछि राष्ट्रपति सी जिनपिङले गृह मन्त्रालयलाई निगरानी प्रणाली सुदृढ गर्न निर्देशन दिए। "फेङचियाओ अनुभव," "चाओयाङ मासेस," र "रेड मेपल स्वयंसेवक गार्ड्स" जस्ता योजनाहरूले छिमेकीहरूलाई निगरानीमा संलग्न गराउने प्रयास गरेका छन्। तर, यस्ता नियन्त्रण प्रणालीले समस्या समाधान गर्नुको सट्टा सामाजिक दबाबलाई थप बढाउन सक्छ।

युवाहरूको असन्तुष्टि विशेष गरी गहिरो देखिन्छ। चीनका युवाहरू उच्च प्रतिस्पर्धी रोजगारी बजार, चर्को जीवनस्तर, र सामाजिक प्रणालीका कारण निराश भएका छन्। सामाजिक सञ्जालमा कडा सेन्सरसिप र निगरानीले उनीहरूको गुनासा व्यक्त गर्न कुनै ठोस माध्यम दिएको छैन।

धेरैजसो हिंसात्मक घटनाहरू प्रतीकात्मक स्थानहरूलाई लक्षित गरेका छन्, जस्तै विद्यालयहरू र अन्य शैक्षिक संस्थाहरू। बेइजिङ, ग्वाङ्झाउ र सुजोमा भएका आक्रमणहरूले आक्रमणकारीहरूले केवल हानी पु¥याउन मात्र नभई समाजको स्थायित्व र भविष्यप्रति विरोध जनाएका छन्।

यी घटनाहरूले चिनियाँ समाजमा गहिरो समस्या रहेको पुष्टि गर्छ। यदि सामाजिक दबाब, अभिव्यक्तिको कमी, र आर्थिक असमानताको जरा समाधान नगर्ने हो भने, हिंसात्मक घटनाहरू अझ गहिरो रूपमा पुनरावृत्ति हुने सम्भावना रहन्छ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।