काठमाडौं – जनता समाजवादी पार्टी (जसपा) नेपालका अध्यक्ष महन्थ ठाकुर र वरिष्ठ नेता राजेन्द्र महतो पक्ष नयाँ दल दर्ता तयारीमा जुटेको छ ।

जसपामा अल्पमतमा रहेका ठाकुर र महतो पक्ष निर्वाचन आयोगमा केन्द्रीय कार्यकारिणी समिति बहुमत सदस्यको हस्ताक्षर बुझाउन नसकेपछि नयाँ दल दर्ता तयारीमा जुटेको छ ।

जसपा कार्यकारिणी समिति ५१ सदस्यीय छ । जसमा तत्कालीन राष्ट्रिय जनता पार्टी (राजपा) बाट २६ र संघीय समाजवादीबाट २५ जना थिए तर तत्कालीन राजपाका तर्फबाट कार्यकारिणी समितिमा रहेका नवलकिशोर साह, रामनरेश यादव, महेन्द्रराय यादव, रमेश यादव, मृगेन्द्रकुमार सिंह यादव र गजाधर यादवले अन्तिम समय ठाकुर र महतोको साथ छोडिदिएका छन् ।

जसपा नेताका अनुसार ठाकुर पक्ष अल्पमतमा परेपछि नयाँ दल दर्ता तयारीमा रहेको छ । ‘कार्यकारिणी समितिमा अल्मतमा परेपछि ठाकुर र महतोजीहरु नयाँ दल दर्ताका लागि आन्तरिक तयारीमा हुनुहुन्छ,’ जसपा स्रोतले भन्यो ।

उपप्रधामन्त्री समेत रहेका महतोनिकट साह २ नम्बर प्रदेशमा सामाजिक विकासमन्त्री छन् । महेन्द्रनिकट रामनरेश पनि २ नम्बर प्रदेशमा वन तथा वातावरणमन्त्री छन् । महेन्द्र निकटका रमेश जसपा उपेन्द्र यादव पक्षमा पुगेका छन् ।

संघीय सरकारमा उद्योग तथा वाणिज्यमन्त्रीमा नियुक्त राजकिशोर यादवनिकट गजाधर उपेन्द्र पक्षमा गएका छन् ।

स्रोतका अनुसार राजपाबाट कार्यकारिणी समितिमा रहेका ६ नेता उपेन्द्र पक्षमा पुगेपछि ठाकुर र महतो पक्ष अल्पमतमा परेका छन् । प्रधानमन्त्री केपी शर्मा ओली सरकारमा सहभागी हुने कि नहुने भन्ने विवादले पार्टीभित्र चर्को बहस भएको थियो । तर ठाकुर र महतो समूह सरकारमा सहभागी भएपछि पार्टी पनि विभाजन भएको छ ।

विवाद चर्किंदै गएपछि एकअर्कालाई स्पष्टीकरण सोधेर अनुशासनको कारवाही समेत गरिएको छ । गत जेठ १८ गते उपेन्द्र समूहले ठाकुर, महतो, लक्ष्मणलाल कर्ण र सर्वेन्द्रनाथ शुक्ल तथा सोही दिन उपेन्द्रलाई समेत ठाकुर पक्षले कारवाही गर्‍यो । दुबै पक्षले एकअर्कालाई पार्टी साधारण सदस्य समेत नरहने गरी कारवाही गरेर निर्वाचन आयोगलाई पार्टी अभिलेख अद्यावधिक गर्न माग गर्दै निवेदन दिए ।

गत जेठ १९ गते आयोगले दुबै निवेदन राजनीतिक दलसम्बन्धी नियमावली २०७३ (पहिलो संशोधन) अनुरूप नभएपछि बदर गर्दै अनुसूची १८ बमोजिमको फाराम समेत भरेर पठाउन भन्दै पत्राचार गरेको थियो । तर ठाकुर पक्षले सोबमोजिम निवेदन पेश गर्न सकेको छैन ।

अनुसूची १८ मा दल विवरण हेरफेर गर्नुपर्ने भएमा सो ढाँचाअनुसार निर्वाचन आयोगमा लेखी पठाउनुपर्ने व्यवस्था रहेको छ । आयोगले पत्रमा ठाकुर पक्षलाई केन्द्रीय कार्यकारिणी समिति बैठकमा उपस्थित सदस्यको हस्ताक्षर सहितको माइन्युट समेत आयोगमा पेश गर्न भनेको थियो ।

यादवले भने केन्द्रीय कार्यकारिणी समितिको बहुमत सदस्यको हस्ताक्षरसहित ठाकुरलाई कारवाही गरिएको पत्र बुझाएका कारण उनलाई अनुसूची १८ को फाराम मात्रै भर्न भन्यो । यादवले गत जेठ २० गते नै भरेर बुझाइसकेका छन् ।

बहुमत केन्द्रीय कार्यकारिणी सदस्यले यादवको पक्षमा हस्ताक्षर गरेकाले ठाकुर पक्षलाई बहुमत जुटाउन सकस भएको छ ।

ठाकुर पक्षले आयोगले भने बमोजिम पत्र पेश गर्न नसकेपछि गत जेठ २३ गते १ हप्ताको समय माग गरेको छ । ठाकुर पक्षले मागेको समय शुक्रवार सकिएको छ ।

जसपा संसदीय दलमा ठाकुर र महतो पक्षको बहुमत रहेको थियो । २० सांसदसहित बहुमतमा रहेको ठाकुर पक्षले महतोलाई संसदीय दलको नेता चयन गरेको थियो । 

तर प्रतिनिधिसभा विघटन भएकाले अब कार्यकारिणी समितिमा अनिवार्य बहुमतसिद्ध गर्नुपर्ने हुन्छ । यद्यपि कार्यकारिणी समितिमा उपेन्द्र पक्षको बहुमत रहेकाले ठाकुर र महतो पक्षले नयाँ दल दर्ता गर्नुपर्ने भएको छ । आजको राजधानी दैनिकमा समाचार प्रकाशित छ । 

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

बाबुरामका भाइको घरमा जसपाको गोप्य भेला, के पाक्दैछ खिचडी ?

बाबुरामको पार्टीले माग्यो रेशम चौधरीको रिहाइ

संविधान दिवसमा जसपाले गर्याे उल्टाे निर्णय, देश हल्लाउनसक्ने संकेत

ओलीका विषयमा जसपाका अध्यक्षले गरे गम्भीर खुलासा

जसपाको संघीय परिषद अध्यक्ष बने डा. बाबुराम भट्टराई

जसपाले उठयो गम्भीर कदम, ओली सरकारको खेल खतम !