काठमाडौं – प्रतिनिधिसभा पुनर्स्थापना र कम्युनिस्ट एकता भंगको नयाँ परिस्थितिमा सत्ताको चाबी जनता समाजवादी पार्टी (जसपा) को हातमा पुगेको छ ।

प्रधानमन्त्री केपी शर्मा ओलीलाई जसरी पनि ढाल्ने रणनीतिमा लागेको माओवादी केन्द्रको सहकार्य पहलमा जसपाले खासै रुचि देखाएको छैन । बरु सत्ता टिकाउने प्रधानमन्त्रीको कदममा साथ दिने संकेत उसले देखाएको छ । 

सरकार र जसपा नेतृत्वबीच भएको अनौपचारिक वार्ता साविककै अवस्थाबाट अघि बढे आगामी हप्ता सत्ता साझेदारीको प्रक्रिया अघि बढ्ने सम्भावना छ । प्रधानमन्त्री ओली र जसपा नेताहरुबीच अनौपचारिक वार्तापछि मधेश–थरुहट आन्दोलनका क्रममा चलाइएका २९२ मध्ये केही मुद्दाको फस्र्योट तत्काल हुनसक्ने दाबी समेत उच्च स्रोतले गरेको छ ।

स्रोतका अनुसार प्रधानमन्त्रीले महान्यायाधिवक्तालाई तीमध्ये केही प्रमुख मुद्दाको फस्र्योट तत्काल गर्न निर्देशन दिएका छन् । प्रतिनिधिसभा सदस्य रेशमलाल चौधरीको रिहाइको विषय त्यसमध्ये एक हो । प्रधानमन्त्रीसँगको छलफलका क्रममा जसपाले संविधानका केही प्रावधानको संशोधन गर्ने शर्तमा मात्र सरकारमा सहभागी हुने संकेत दिएको छ ।

‘यद्यपि जसपाले माओवादी र कांग्रेससँगको सहकार्यमा भन्दा प्रधानमन्त्री ओलीसँग मिलेर सरकारमा सहभागी हुनुलाई प्राथमिकतामा राखेको छ,’ पार्टी स्रोतले भन्यो ।

वर्तमान राजनीतिक परिदृश्यमा जसपाभित्र २ धार स्पष्ट रुपमा देखिए पनि सत्ताका लागि फुट्ने सम्भावना भने निकै कम देखिएको छ । ‘हामी सर्वसम्मतिमै सत्तामा जान्छौं,’ स्रोतले भन्यो, ‘जारी भएदेखि नै संविधान संशोधन जसपाको माग रहँदै आएको छ । जसपा फुट्ने सम्भावना निकै कम छ ।’

जसपाका नेता केशव झा वर्तमान अवस्थामा कांग्रेस र माओवादीले सामान्य राजनीतिक संस्कारलाई समेत आत्मसात नगरेको बताउँछन् । ‘कांग्रेस र माओवादीमा सामान्य राजनीतिक संस्कार पनि देखिएन,’ उनले भने, ‘जसपाको अन्तिम उद्देश्य भनेको कांग्रेस र कम्युनिस्ट पार्टीको विकल्प नै हो । यद्यपि अहिले जसपाभित्र दुई धार रहेको छ ।’ 

जसपाका वरिष्ठ नेता अशोक राईले भने, ‘हाम्रो माग जसले पहिला पूरा गर्छ, उसैलाई साथ दिन्छौं । कांग्रेस र कम्युनिस्टले आफ्नो लागि मात्र बनाएको वर्तमान संविधान संशोधन नभएसम्म स्वीकार्य हुन सक्दैन ।’ 

सांसद रेशम चौधरीको रिहाइ र मधेश–थरुहट आन्दोलनका बेला लगाइएका झूटा मुद्दा फिर्ता नै प्रधानमन्त्री केपी शर्मा ओलीसँगको वार्ताका लागि सहज वातावरण हुन सक्ने वरिष्ठ नेता राईले बताएका छन् ।

पार्टी नेता लक्ष्मणलाल कर्ण र सर्वेन्द्रनाथ शुक्लको भनाइ उस्तैउस्तै छ । सत्ता समीकरणका लागि नभई सांसद चौधरीको रिहाइ र मधेश–थरुहट आन्दोलनका बेला लगाइएका झूटा मुद्दा फिर्ता तथा संविधान संशोधनको उपयुक्त वातावरण बनाउन अनौपचारिक वार्ताको पहल गरेको उनीहरुको भनाइ रहेको छ । कर्णले भने, ‘प्रधानमन्त्री ओलीले नैतिकताका आधारमा राजीनामा नदिने र कांग्रेसले निर्वाचनमै जाने अडान लिएको वर्तमान अवस्थामा जसपा सत्ता साझेदारीको खेलमा सहभागी हुनु हुँदैन ।’

वरिष्ठ नेता राई भने कांग्रेस, एमाले र माओवादी केन्द्र ३ वटै दल प्रतिगमनकारी भएको आरोप लगाउँछन् । उनी भन्छन्, ‘अन्तरिम संविधान निर्माण भइरहँदा उनीहरुले संघीयता, समानुपातिक र समावेशितालाई बेवास्ता गरेका थिए ।’

‘उपेन्द्र यादव र डा. बाबुराम भट्टराईले केपी ओलीलाई मात्रै प्रतिगमनकारी देखिरहनु तथा महन्थ ठाकुर, राजेन्द्र महतो, महेन्द्र राय यादव, शरतसिंह भण्डारी र अनिलकुमार झा प्रधानमन्त्री ओली सरकारसँग सत्ता साझेदारीका लागि अघि बढ्नु जसपाभित्रको आजको राजनीतिक अन्योलको मुख्य कारण हो,’ जसपाका एक वरिष्ठ नेताले भने । आजको अन्नपूर्ण पोस्ट दैनिकमा समाचार प्रकाशित छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

बाबुरामका भाइको घरमा जसपाको गोप्य भेला, के पाक्दैछ खिचडी ?

बाबुरामको पार्टीले माग्यो रेशम चौधरीको रिहाइ

संविधान दिवसमा जसपाले गर्याे उल्टाे निर्णय, देश हल्लाउनसक्ने संकेत

ओलीका विषयमा जसपाका अध्यक्षले गरे गम्भीर खुलासा

जसपाको संघीय परिषद अध्यक्ष बने डा. बाबुराम भट्टराई

जसपाले उठयो गम्भीर कदम, ओली सरकारको खेल खतम !