सिन्धुपाल्चाेक- सिन्धुपाल्चोकमा फेरि पहिराे गएकाे छ । भोटेकोशी गाउँपालिका-४ फुल्पिङकट्टीमा गएराति अविरल वर्षासँगै गएको पहिरोमा परेर पाँच जना बेपत्ता भएका हुन्।
एक साताअघि गएको पहिरोमा बेपत्ता भएका २० जना नभेटिँदै जिल्लामा थप पाँच जना पहिरोमा बेपत्ता भएका हुन्।
हिजाे रातिकाे पहिराेले दुर्इ घर बगाउँदा पाँच जना बेपत्ता भएका स्थानीय बासिन्दाले जानकारी दिएका छन्। घटना गए राति ११ बजेको हो। घटनास्थल सदरमुकामबाट ७५ किमी टाढा पर्छ।
घटनाको विस्तृत विवरण आउन बाँकी रहेको सिन्धुपाल्चोकका प्रहरी प्रमुख एसपी प्रज्वल महर्जनले जानकारी दिए। ‘घटनामा पाँच जना बेपत्ता भएको खबर आएको छ,’ एसपी महर्जनले बिहीबार बिहान नेपालखबरसँग भने, ‘प्रहरी अझै घटनास्थलमा पुग्न नसकेकाले विस्तृत विवरण प्राप्त भएको छैन।’
सबैभन्दा नजिक रहेको फुलपिन कट्टी प्रहरी चौकीबाट घटनास्थल पुग्न तीन घण्टा लाग्ने र घटनास्थलमा सशस्त्रको टोली पनि गइरहेकाे बताइएकाे छ ।
एक साताअघि सिन्धुपाल्चोकको बाह्रबिसे नगरपालिकामा गएको बाढीपहिरोमा परेर बेपत्ता भएका २० जना अझै भेटिएका छैनन्।
