काठमाडौं – सरकारले जारी गरेको लिम्पियाधुरी सहितको नक्सालाई खुला चुनौती दिएर नमान्ने बताउँदै आएकी समाजवादी पार्टीकी समानुपातिक सांसद सरिता गिरीले पार्टीको निर्देशन समेत नमान्ने स्पष्ट पारेकी छन् ।

नेपालको नक्सा सम्बन्धी संसदमा दर्ता भएको संविधान संशोधन विधेयक खारेजको माग गर्दै विधेयक संशोधन दर्ता गराएकी सांसद सरिता गिरीलाई पार्टीले संशोधन फिर्ता लिन निर्देशन दिएको थियो । तर गिरीले आफूले दर्ता गराएको संशोधन प्रस्ताव फिर्ता नलिने प्रतिक्रिया दिएकी छन् ।

पार्टीका प्रमुख सचेतक उमाशंकर अरगरियाले पार्टीको निर्देशन विना नै प्रस्ताव दर्ता गराएकाले तत्काल फिर्ता लिन निर्देशन दिएका थिए । निर्देशन पालना नगरे कारवाही गर्ने चेतावनी समेत दिइएको छ ।

सांसद गिरीले प्रस्तावको अडानबाट पछि नहट्ने संकेत गरेकी छन् । ‘मलाई पार्टीका महासचिव, प्रमुख सचेतक सहितका नेताहरुले भेटेका छन् । मैले आफ्नो अडानबारे भनिसकेकी छु,’ सांसद गिरीले भनिन् ।

संसदमा नक्साबारेको संशोधन प्रस्ताव तथ्यपरक रुपमा राखेको जिकिर समेत सांसद गिरीले गरेकी छन् । ‘विना प्रमाण सरकारले नक्सासम्बन्धी संशोधन ल्याएको छ, प्रमाण बाहिरी देखाएर हुँदैन, संशोधनमा ती कुरा ल्याउनुपर्‍यो, नत्र खारेज हुनुपर्छ,’ उनले भनिन् ।

पार्टी अध्यक्ष डा. बाबुराम भट्टराई र उपेन्द्र यादवले अब सांसद गिरीमाथि कस्तो कारवाही अगाडि बढाउँछन् ? हेर्न बाँकी छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।