काठमाडौं – नेपाली कांग्रेसका युवा नेता तथा खेलकुद विभागका सदस्य सचिव मीनकृष्ण महर्जनले वर्तमान सरकार भ्रष्टाचार लिप्त भएको आरोप लगाएका छन् ।

‘सरकार २५ हजार आरडीटी किट र ५ वटा पीसीआर टेस्ट गर्ने मेसिन किनेर १० अर्ब खर्च भयो भन्दैछ । सरकारले जनतालाई हिसाब बुझाउनुपर्छ,’ उनले भने, ‘केवल २५ हजार आरडीटी किट र ५ वटा पीसीआर टेस्ट मेसिन खरिद गरेको भरमा १० अर्ब सकिँदैन । यसो भन्नु हाँस्यास्पद कुरा हो ।’

देशमा लकडाउन घोषणा गरेर जनतालाई घरमै कैद गरेर सरकार भ्रष्टाचारमा लिप्त रहेको पनि महर्जनले आरोप लगाए ।
उनले प्रश्न गरे, ‘महामारीको यस्तो राष्ट्रिय विपत्तिको बेलामा पनि सरकार भ्रष्टाचारमा लिप्त हुने ? अनि सुखी नेपाली र समृद्ध नेपालको नारा जप्ने ? के जनताले यसैका लागि नेकपालाई बहुमत दिएका थिए ? राज्यकोषबाट भएको खर्चको हिसाबकिताब जनतालाई दिनु पर्दैन ? यसको उत्तर कसले दिने ?’

सरकार पूरै असफल भइसकेको बताउँदै नेता महर्जनले स्वास्थमन्त्री पदमा रहिरहनु औचित्य नदेखिएको बताए । ‘सरकार दिन प्रतिदिन एकपछि अर्को काण्डमा मुछिँदै आइरहेको छ । यसको हिसाबकिताब आगामी निर्वाचनमा जनताले गर्ने निश्चित छ । जनताका हितमा भन्दा पनि कमाउधन्दामा सरकार क्रियाशील छ,’ उनले भने, ‘लकडाउनका कारण जनता भोकभोकै मर्ने अवस्थामा छन् । लकडाउनकै समयमा मानसिक समस्यामा परेर १२ भन्दा वढिले आत्महत्याको बाटो रोज्न बाध्य भए । यस्तो अवस्थामा पनि सरकारमा रहेका जिम्मेवार मन्त्रीहरुलाई कुनै आत्मग्लानी छैन । यसले सरकार जनताप्रति उत्तरदायी नभएको आभाष गराइसकेको छ । त्यसैले सचेत नागरिकहरुले यो सरकारको गैरजिम्मेवारीपन र यिनीहरूले गरेको भ्रष्टाचारको बारेमा भण्डाफोर अभियान चलाउनु आवश्यक भइसकेको छ ।’

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।