काठमाडौं – कम्युनिस्ट प्रधानमन्त्री केपी शर्मा ओली नेतृत्वको सरकारले कोरोना भाइरस संक्रमण परीक्षणमा ढिलाइ गरिरहेको भनेर आलोचना भइरहेका बेला डोटीमा कोरोना परीक्षण हुन नपाउँदै एक व्यक्तिको क्वारेन्टाइनमा मृत्यु भएको छ ।

डोटीको केआई सिंह गाउँपालिका–३ को सिताराम आधारभूत विद्यालयको क्वारेन्टाइनमा रहेका १९ वर्षीय युवकको मुत्यु भएको छ ।

भारतको लुधियानाबाट १९ गते डोटी पुगेका ती युवा २० गतेदेखि गाउँपालिकाले व्यवस्थापन गरेको क्वारेन्टाइनमा बसिरहेका थिए ।

आईतबार बिहानै करीब ३ बजेतिर ती युवकको मृत्यु भएको स्थानीय शेरबहादुर ऐरले बताए । उनी मुटुको रोगी भएको बताइएको छ । सो क्वारेन्टाइनमा ३ महिलासहित १० जना रहेका छन् ।

मृतकको स्वाब संकलनका लागि टोली पठाइसकेको स्वास्थ्य कार्यालय डोटीका प्रमुख रमेश मलासीले बताएका छन् । ‘क्वारेन्टाइनमा रहेका १० जनाकै स्वाब संकलन गरी धनगढी पठाउछौं, साँझसम्म भरसक रिपोर्ट आउँछ,’ उनले भने । प्रमुख मलासीले रिपोर्ट नआएसम्म शव नउठाइने बताएका छन् ।

घटनास्थलमा प्रहरी टोली पुगिसकेको जिल्ला प्रहरी कार्यालय डोटीका प्रहरी निरीक्षक कर्णबहादुर बोहराले बताएका छन् । स्वाबको नतिजा नआएसम्म शव प्रहरीको निगरानीमा रहने जनाइएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।