काठमाडौं – राजधानी काठमाडौंको त्रिभुवन विश्वविद्यालय शिक्षण (टिचिङ) अस्पतालबाट फर्केर रोल्पा जिल्ला अस्पतालको आइसोलेसनमा भर्ना भएका युवाको मृत्यु भएको छ ।

रोल्पा नगरपालिका–१ सानो लिबाङका युवाको जिल्ला अस्पतालको आइसोलेसनमै रहेको बेला सोमवार दिउँसो मृत्यु भएको हो ।

लामो समयदेखि मृगौला रोगबाट प्रभावित युवा काठमाडौंको टिचिङ अस्पतालमा उपचार गरी हालसालै रोल्पा फर्किएका थिए । २२ वर्षीय युवक मृगौलाको डाइलासिस गराएर गृहजिल्ला फर्काइएको थियो ।

टिचिङ अस्पतालबाट फर्काएका युवालाई आईतवार राति साढे १० बजे रोल्पा अस्पताल रेउघामा भर्ना गरिएको थियो । घरभन्दा अस्पतालमा हेरचाह र उपचार सहज होस् भनेर परिवारले युवालाई घर नलगेर अस्पताल पुर्‍याएका थिए ।

आइसोलेसनमै रहेका बेला युवकको मृत्यु भएको अस्पतालकी डाक्टर धनमाया घर्तीमगरले बताइन् । २ वर्षयता युवा मृगौलाको समस्याले थलिएका थिए ।

पटक–पटक डाइलासिस गराउँदै आएका उनको राजधानीको अस्पतालबाट फर्किएपछि मृत्यु भएको छ । मृगौला पीडित भएपनि विभिन्न अस्तालबाट फर्किएकाले आइसोलेसनमा राखेर उपचार थालिएको थियो । आइसोलेसनमै मृत्यु भएकाले कोरोना संक्रमण भए/नभएको यकिन गर्न जाँच गरिने अस्पतालका मेडिकल सुपरिन्टेन्डेन्ट डा. घर्तीमगले बताएकी छन् ।

अस्पतालमा युवाको आरडीटी जाँच गर्दा नेगेटिभ आएको थियो । पीसीआर स्वाब संकलन गरी परिक्षणका लागि पठाउने व्यवस्था मिलाएको अस्पताल प्रशासनले जनाएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।