काठमाडौं – कम्युनिस्ट प्रधानमन्त्री केपी शर्मा ओली मिर्गाैला पुनः प्रत्यारोपणपछि बालुवाटारमै आराम गरिरहेका छन् । मन्त्रिपरिषद् बैठक बालुवाटारमै गर्छन्, बालुवाटारबाटै देशवासीका नाममा सम्बोधन गर्छन् । ओली सरकारले बालुवाटार र सिंहदरबारबाट जेसुकै निर्णय गरेपनि गाउँगाउँमा खटिएका सबै स्वास्थ्यकर्मीले न सुरक्षा सामग्री पाएका छन्, न सर्वसाधारणले राहत । प्रधानमन्त्री र सरकार बालुवाटार र सिंहदरबारमै सीमित रहेका बेला कांग्रेस नेता कार्यकर्ताले गाउँगाउँमा पुगेर स्वास्थ्य सामग्री र राहत वितरण गरिरहेका छन् । बुधबार नेपाली कांग्रेसका युवा नेता एवं पूर्वसांसद रामहरि खतिवडाले कोरोना भाइरस संक्रमणको खतरालाई मध्यनजर गर्दै ओखलढुंगा जिल्लामा १० हजार थान मास्क, २५ थान पीपीई सेट, ग्लोब्स प्रत्येक ७ वटा गाउँपालिका र १ वटा नगरपालिकालाई वितरण गरेका छन् । नेता खतिवडाले सबै स्थानीय तहका अध्यक्षलाई भेटेर १ हजार थान मास्क र २ थान पीपीईसहित स्वास्थ्य सामग्री दिएका छन् । बाँकी रहेको सुरक्षा सामानलाई जिल्ला प्रशासन कार्यालयमा सीडीओलाई जिम्मा दिएका छन् ।  ‘मलाई ओखलढुंगाका मेरा भगवान समान जनतासँग भेट गर्न असाध्यै मन भएकाले यो विषम परिस्थितिमा पनि भेट्न आएँ,’ युवा नेता खतिवडाले स्वास्थ्य सामग्री हस्तान्तरण गर्दै भने, ‘संसारमा हामीले मान्छे मार्न ठूलो–ठूलो हतियारहरू बनायौं तर रोगसँग लड्नलाई केही बनाएको रहेनछौं । यो रोगसँग लड्न हामी आफैं सचेत हुनुपर्ने भएकाले आफैं सचेत हुनुपर्छ ।’ स्वास्थ सामग्री हस्तान्तरण कार्यक्रममा नेपाली कांग्रेस ओखलढुंगा जिल्ला पार्टी सभापति प्रदिपकुमार सुनुवारले कोरोना रोगको हालसम्म कुनै औषधि नभएकाले आफैंले आफ्नो ख्याल गर्न अनुरोध गरेका छन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।