काठमाडौं – कोरोना भाइरस संक्रमणको चौथो व्यक्तिको रुपमा धनगढीका फेला परेका पुरुष संक्रमितले चैत ८ गते बुद्ध एयरको विमानबाट काठमाडौं–धनगढी यात्रा गरेको खुलासा भएको छ । ती व्यक्ति दुबईबाट भारतको राजधानी दिल्ली हुँदै हवाई यात्राबाट काठमाडौं पुगेका थिए । त्यसपछि चैत ८ गते उनी काठमाडौंबाट नेपालगञ्ज बुद्ध एयरको विमानमा र नेपालगञ्जबाट धनगढी बसमा पुगेका थिए । बुद्ध एयर नेपालगञ्जका इन्चार्ज दिनेश साहले ती व्यक्तिले विमान यात्रा गरेको पाइएको पुष्टि गरे । चैत ८ गते धनगढी पुगेका उनी चैत ११ गते सेती प्रादेशिक अस्पतालमा भर्ना भएका थिए । उनलाई सेती प्रादेशिक अस्पतालको आइसोलेसनमा राखिएको थियो । आइसोलेसनमा राखिएपछि उनको थ्रोट स्वाबको नमूना परीक्षणका लागि काठमाडौंस्थित राष्ट्रिय जनस्वास्थ्य प्रयोगशाला पठाइएपछि ‘पोजेटिभ’ नतिजा आएको थियो । काठमाडौं–नेपालगञ्ज बुद्ध एयरमा हवाई यात्रा र त्यसपछि नेपालगञ्ज धनगढीसम्म बसको यात्रा गरेका कारण उनीबाट अरु धेरै व्यक्तिमा कोरोनाको संक्रमण फैलिएको हुनसक्ने अनुमान गर्न थालिएको छ । सेती प्रादेशिक अस्पतालले भने कोरोनाको संक्रमण पुष्टि भएका युवकको स्वास्थ्य अवस्था सामान्य रहेको विज्ञप्तिमार्फत् जानकारी दिएको छ । यसअघि नेपालमा ३ जनामा संक्रमण पुष्टि भइसकेको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।