काठमाडौं – प्रधानमन्त्री केपी शर्मा ओली अस्पताल भर्ना भएका बेला सत्तारुढ नेपाल कम्युनिस्ट पार्टी (नेकपा) सांसदले कांग्रेस लगायतसँग मिलेर संसदमा छुट्टै प्रस्ताव दर्ता गराएका छन् । प्रदेश २ लाई विशेष दर्ताको राज्य घोषणा गरी ओली नेतृत्वको संघीय सरकारबाट विशेष अनुदान प्याकेज लागू गराउन नेकपा सांसद प्रभू शाहले प्रतिनिधि सभामा सार्वजनिक महत्वको प्रस्ताव दर्ता गराएका छन् । नेकपा सांसदको प्रस्तावलाई कांग्रेस सांसद अमरेशकुमार सिंह, राजपाका सांसद लक्ष्मणलाल कर्ण र समाजवादी पार्टीका सांसद उमाशंकर अरगरियाको समर्थन रहेको छ । प्रधानमन्त्री ओलीले भने मधेशी समुदायले उठाएका मागलाई बेवास्ता गरेपछि केही महिनाअघि समाजवादी पार्टीले सरकारलाई दिएको समर्थन फिर्ता गरेको थियो । सरकारले प्रदेश २ का समस्या र मुद्दालाई सम्बोधन नगरेपछि नेकपा सांसदले कांग्रेस लगायत दलका सांसदसँग मिलेर संसदमा प्रस्ताव दर्ता गराएका छन् । संसदमा दर्ता भएको प्रस्ताव पारित भएमा ओली सरकारले प्रदेश २ लाई प्राथमिकतामा राख्नुपर्ने बाध्यता आउने छ । प्रस्तावमा कर्णाली प्रदेशलाई समेत विशेष महत्व दिनुपर्ने भनिएपनि कर्णालीका सांसदको समर्थन जुटाइएको छैन । संसदमा छलफलका क्रममा कर्णाली प्रदेशका सांसदको समेत समर्थन जुटाइने स्रोतले जनाएको छ ।   बालुवाटार जग्गा काण्डमा पूर्व प्रधानमन्त्री माधवकुमार नेपाल मुछिँदा सामाजिक सञ्जालमा खुलेर विरोध गरेका प्रभू साहलाई कारवाही गर्न नेकपाले प्रक्रिया अगाडि बढाएपछि उनले कांग्रेससँग मिलेर छुट्टै प्रस्ताव संसदमा दर्ता गराएका हुन् । नेकपाले सांसद साहलाई स्पष्टीकरण सोध्ने लगायत प्रक्रिया अगाडि बढाएको छ । सांसद साहले जग्गाबारे निर्णय गर्ने मन्त्रिपरिषद्को अध्यक्ष प्रधानमन्त्रीले उन्मुक्ति पाउने र मन्त्रीविरुद्ध मुद्दा चल्ने प्रक्रियाको खुलेरै विरोध गरेका थिए ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।