काठमाडौं– मेडिकल व्यवसायी दुर्गा प्रसाईले चिकित्सा शिक्षा आयोगका उपाध्यक्ष श्रीकृष्ण गिरीले आफूसँग २० करोड घुस मागेको विषय पेचिलो बन्दै गएको छ ।

उनले गत साता पत्रकार सम्मेलन गरी बी एन्स सी मेडिकल कलेजलाई सम्बन्धन दिलाउन गिरीले आफूसँग २० करोड घुस मागेको खुलाएका थिए । गिरीले त्यसैदिन पत्रकार सम्मेलन गरी घुस नमागेको र प्रमाण दिन चुनौती दिएका थिए । तर, प्रसाईले घुसकाण्डबारे अख्तियार दुरुपयोग अनुसन्धान आयोग र सम्पत्ति शुद्धीकरणलाई छानबिन गर्न निवेदन दिएका छन् ।

प्रसाईको यो निवेदनसँगै गिरी अनुसन्धानमा तानिने निश्चित छ । साथै, उनको पदसमेत धरापमा परेको छ । त्यति मात्र होइन, प्रसाईले घुसकाण्डमा नेकपाका प्रवक्ता नारायणकाजी श्रेष्ठ र शिक्षामन्त्री गिरिराजमणि पोखरेलको समेत नाम पोलेका छन् । गिरीले प्रसाईसँग घुस माग्दा नेकपा प्रवक्ता श्रेष्ठ र शिक्षामन्त्री पोखरेललाई पनि भाग दिनुपर्ने उल्लेख गरेको उनले सार्वजनिक रूपमै बताएपछि श्रेष्ठ र पोखरेलको इमानमा दाग लागेको छ ।

श्रेष्ठ र पोखरेल नेकपामा इमान्दार नेताका रूपमा परिचित छन् । तर, यो घटनाले दुवैको राजनीतिक छवि धुमेलिने निश्चित छ । पूर्वमाओवादी नेताहरूलाई भ्रष्टाचारमा मुछेर बदनाम गर्ने ढंगले घुसकाण्ड सार्वजनिक गरिएको नेकपा नेताहरू बताउँछन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।