काठमाडौं - सरकारले रौतहटको गौरमा १७ वर्षअघि गरिएको सामूहिक हत्याकाण्डको अनुसन्धान प्रक्रिया अघि बढाउने भएको छ ।

गृह मन्त्रालय र गौर हत्याकाण्डपीडित मंगलबार संघर्ष समितिबीच भएको पाँचबुँदे सहमतिपछि ‘गौर हत्याकाण्ड’को अनुसन्धान हुने भएको हो । गृह मन्त्रालयले मातहतका निकायलाई अनुसन्धान अघि बढाउन निर्देशन दिएसँगै अनुसन्धान अघि बढ्ने भएको छ ।

अनुसन्धान जहाँ पुगेको छ, त्यही बिन्दुबाट अघि बढाइनेछ र दोषीलाई कारबाही गरिने बताइएको छ । संघर्ष समिति र गृह मन्त्रालयबीच मंगलबार हत्याकाण्डको अनुसन्धान गर्ने र दोषीलाई कारबाही गर्ने सहमति भएको थियो ।

सहमतिपत्रमा गृह मन्त्रालयका तर्फबाट सहसचिव नारायणप्रसाद भट्टराई र संघर्ष समितिको तर्फबाट अध्यक्ष रूपसागर देवीले हस्ताक्षर गरेका छन् ।

गृह प्रवक्तासमेत रहेका सहसचिव भट्टराईले गौर हत्याकाण्ड अनुसन्धान गर्न संघर्ष समितिसँग सहमति भएको बताए । गृहका अनुसार अनुसन्धान प्रक्रिया तुरुन्तै अगाडि बढाइनेछ ।

जिल्ला प्रशासन कार्यालय रौतहट र नेपाल प्रहरीलाई तुरुन्तै निर्देशन दिने गृहको तयारी छ । विगतकै जाहेरीका आधारमा अनुसन्धान अगाडि बढ्नेछ । ७ चैत ०६३ मा रौतहटको सदरमुकाम रंगेलीमा तत्कालीन मधेसी जनअधिकार फोरम र माओवादीले एकै स्थानमा आमसभा आयोजना गरेका थिए । त्यसक्रममा झडप भएको थियो ।

घटनामा माओवादीका २९ जना कार्यकर्ता र समर्थकलाई लखेटी–लखेटी भाला र बाँसका कप्टेरोले घोचेर हत्या गरिएको थियो । घटनालगत्तै पीडित परिवारले जिल्ला प्रहरी कार्यालयमा जाहेरी दिएका थिए । तर, राजनीतिक दबाबका कारण हालसम्म अनुसन्धान हुन सकेको छैन ।

हत्याकाण्डको अनुसन्धान गराई दोषीलाई कारबाहीको दायरामा ल्याउन पीडितहरूपटक–पटक राष्ट्रिय मानव अधिकार आयोगदेखि अदालत धाएका थिए ।

आयोगले घटनाको स्थलगत अध्ययन गरी प्रतिवेदन तयार पारेको थियो । आयोगले तत्कालीन फोरमका अध्यक्ष उपेन्द्र यादवसहितका नेता हत्यामा संलग्न रहेको भन्दै प्रतिवेदन सार्वजनिक गरेको थियो ।

सरकारले गौर हत्याकाण्डको छानबिन गर्ने भएपछि जनता समाजवादी पार्टीले आकस्मिक रुपमा कार्यकारिणी समितिको बैठक बोलाएको छ ।

पार्टी केन्द्रीय कार्यालय, बालकुमारी ललितपुरमामा आकस्मिक रुपमा बोलाइएको बैठकले गौर हत्याकाण्ड छानबिन गर्ने पुष्पकमल दाहाल प्रचण्ड नेतृत्वको सरकारले समिति बनाउने बिषयमा छलफल हुनेछ ।

गौर हत्याकाण्डको फाइल खुलेसँगै उपेन्द्र यादव तनावमा छन् । उनकै निर्देशनमा हत्याकाण्ड भएको आरोप लाग्दै आएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

गौर हत्याकाण्ड पीडित संघर्ष समितिले अब काठमाडौं केन्द्रित आन्दोलन गर्ने