काठमाडौं - अमेरिकी नागरिकता त्यागेर नेपाली नागरिकता नलिई पुरानै नागरिकताका आधारमा सांसद बनेका राष्ट्रिय स्वतन्त्र पार्टीका सभापति रवि लामिछाने आफ्नो सांसद पद गुमेपछि अहिले मौन छन् ।

पार्टीका गतिविधिबाहेक उनी सार्वजनिक भेटघाटमा छैनन् । नेपाली नागरिकता लिएपछि गुमनाम जस्तै देखिएका रवि चितवन २ मा उपनिर्वाचन नजिकिँदै गर्दा पनि सक्रिय छैनन् ।

मंगलबार सर्वोच्च अदालतले दोहोरो राहदानी प्रकरणमा मौन बसे पनि मुद्दा चल्ने संकेत गरेपछि उनलाई अर्को झड्का लागेको छ । निर्वाचन आयोगले आगामी वैशाख १० गते चितवन २ मा उपनिर्वाचनको मिति तोकेको छ ।

राष्ट्रपति निर्वाचनलगत्तै दलहरू उपनिर्वाचनतर्फ केन्द्रित हुने भएका छन् । तर रवि लामिछानेलाई भने अर्को संकट आइपरेको छ । आयोगले मतदाता नामावली नवीकरण नखोलेमा रवि उम्मेदवार बन्नै वञ्चित हुने भएका छन् ।

रवि चितवन २ मा उठेर सांसद भए पनि उनको मतदाता नामावली काठमाडौंमा छ । उपनिर्वाचन चितवन २ मा हुने भएकाले आयोगले ७७ जिल्लामै मतदाता नामावली नवीकरण गर्न सूचना ननिकाल्न सक्छ ।

रविका लागि सजिलो होस् भनेर आयोगले काठमाडौंमा मात्र मतदाता नामावली नवीकरण गर्न समय तोक्ने सम्भावना धेरै कम छ । त्यसैले अहिले चितवन २ को उपनिर्वाचनको मिति सार्ने तयारी भइरहेको बुझिएको छ ।

रविले नयाँ नेपाली नागरिकता लिएकाले अब मतदाता नामावलीमा त्यही नागरिकताअनुसार नामावली नवीकरण गर्नुपर्ने हुन्छ । पुरानो मतदाता नामावलीका अनुसार उनी उम्मेदवार बन्न पाउँदैनन् ।

मतादाता नामावलीमा नाम नभएको व्यक्ति उम्मेदवार नै बन्न नपाउने भएकाले रविलाई अहिले ठूलै संकेट आइलागेको हो । सोही कारण रविले रास्वपालाई सरकारमा पठाउने र आफू अनुकूल निर्णय गर्न लगाउन कांग्रेस र माओवादी केन्द्रका नेताहरूसँग भेटघाट बढाइरहेको स्रोतले बतायो ।

नागरिकताको मुद्दामा सर्वोच्च अदालतले गत माघ १३ गते गरेको फैसलापछि उनको सांसदसहित, मन्त्री, पार्टी सभापति र संसदीय दलको नेताको जिम्मेवारी एकैपटक गुमेको थियो ।

कायममुकायम प्रधानन्यायाधीश हरिकृष्ण कार्की, न्यायाधीशहरु विश्वम्भरप्रसाद श्रेष्ठ, ईश्वरप्रसाद खतिवडा, आनन्दमोहन भट्टराई र अनिलकुमार सिन्हाको संवैधानिक इजलासले गरेको फैसलापछि लामिछानेले दुई दिनपछि काठमाडौं जिल्ला प्रशासन कार्यालयबाट प्रक्रिया पूरा गरेर नेपाली नागरिकता पुनः प्राप्त गरेका थिए ।

मंगलबार सार्वजनिक भएको ३३ पृष्ठको आदेशको पूर्णपाठमा दोहोरो राहदानीबारे गृह मन्त्रालय र काठमाडौं जिल्ला प्रशासन कार्यालयले आवश्यक छानबिन गरिरहेको उल्लेख छ ।

आदेशमा भनिएको छ, ‘झुठा विवरण दिई राहदानी वा यात्रा अनुमतिपत्र लिएको सम्बन्धी प्रावधानका सन्दर्भमा प्रचलित कानुनबमोजिम निरुपण गरिनुपर्ने विषय देखिएको र गृह मन्त्रालय, जिल्ला प्रशासन कार्यालय काठमाडौं समेतका प्रत्यर्थीहरुको लिखित जवाफबाट राहदानीको विषयमा छानबिन भइरहेको भन्ने तथ्यसमेत खुल्न आएको पाइयो ।

सोही छानबिनका सन्दर्भमा राहदानीसम्बन्धी विषयको निरुपण हुन सक्ने नै हुन्छ ।’ फैसलामा उल्लेख भएको यो बुँदाले रविविरुद्ध दोहोरो राहदानी कसुरमा मुद्दा चल्न सक्ने संकेत गरेको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

रवि लामिछानेले आफ्नो श्रीमानलाई ऋषिमुनि भनेपछि रिसाइन् एलिजा गौतम, दिइन् यस्तो जवाफ

कांग्रेसबाट चुनाव लड्ने भए रवि लामिछाने, मन्त्री बन्ने पक्का! 

रवि लामिछानेका दाजुभाइबीच ठूलो लफडा, स्वतन्त्र उम्मेदवारहरुबीच खैलाबैला 

राजनीतिमा रवि लामिछानेः ‘रवीन्द्र मिश्र भा २’

रवि लामिछानेको दोहोरो चरित्र, परिवारवादको विरोध गरेर श्रीमतिलाई नै बनाए हर्ताकर्ता! 

दल दर्ता नहुँदै रवि लामिछानेलाई लाग्यो ठूलो झट्का, चौतर्फी खैलाबैला!