काठमाडौं- राष्ट्रपति निर्वाचनअन्तर्गत मंगलबारबाट मौन अवधि सुरु भएको छ । निर्वाचन आयोगका अनुसार फागुन २५ गते हुने निर्वाचनको ४८ घन्टाअगाडि मौन अवधि लागू भएको हो । निर्वाचनको ४८ घन्टादेखि मतदानको दिन मतदान केन्द्र बन्द नहुन्जेलसम्म प्रचारप्रसार निषेधको अवधि लागू हुने निर्वाचन आचारसंहितामा व्यवस्था छ । 

भावी राष्ट्रपति निर्वाचनका लागि आठदलीय गठबन्धनबाट कांग्रेस वरिष्ठ नेता रामचन्द्र पौडेल र एमालेबाट उपाध्यक्ष सुवास नेम्वाङ मैदानमा छन् । मौन अवधिको पूर्वसन्ध्यासम्म संसद्को चौथो शक्ति राष्ट्रिय स्वतन्त्र पार्टी र पाँचौँ शक्ति राष्ट्रिय प्रजातन्त्र पार्टीले भने कसलाई भोट दिने भन्नेबारे अझै टुंगोमा पुग्न सकेका छैनन् ।

राष्ट्रपति निर्वाचनमा रास्वपाको दुई हजार चार सय ५० र राप्रपाको एक हजार पाँच सय एक मतभार छ । यी दुवै दलका मत सुरक्षित गर्न पौडेल र नेम्वाङले मत दिन आग्रह गरिसकेका छन् । तर, दुवै दलले कसैलाई पनि ठोस वचन दिएका छैनन् । दुवै उम्मेदवारले ती दलका मत आफूलाई आउने आशा राखेका छन् । 

राप्रपा अध्यक्ष राजेन्द्र लिङ्देनले चुनावको एक दिनअघि आफ्नो पार्टीले कसलाई समर्थन गर्ने वा के गर्ने भन्ने निर्णय गर्ने बताइसकेका छन् । उनले अहिलेको अवस्थामा पार्टी तठस्थ बस्न सक्ने संकेत पनि गरेका छन् । राप्रपामा एउटा पक्ष निर्वाचनमा भाग लिन नहुने र लिइहाले पौडेललाई समर्थन गर्नुपर्ने पक्षमा रहेकाले अध्यक्ष लिङ्देन संकटमा परेका छन् । त्यसैले राप्रपा राष्ट्रपतिको निर्वाचनमा तठस्थ बस्न सक्ने धेरै सम्भावना रहेको राप्रपाका एक नेताले बताए । राप्रपाभित्र ‘नो भोट’ वा गठबन्धनका उम्मेदवारलाई मत दिने दुई विकल्पमा छलफल जारी छ । 

लामिछाने नेतृत्वको रास्वपाले निर्वाचनकै दिन टुंगो लगाउने तयारी गरेको छ । सो पार्टीमा पनि गठबन्धनका उम्मेदवारलाई मतदान गर्ने भन्ने कि तठस्थ बस्ने भन्ने दुईथरी मत छ । रास्वपा संसदीय दलका नेता डोलप्रसाद अर्यालले पार्टीमा कसलाई मत दिने भनेर ठोस छलफल नभएको बताएका छन् । उनका अनुसार राष्ट्रपति निर्वाचनको दिन नै छलफल गरेर पार्टीले निर्णय लिने भएको छ । यदि रास्वपा र राप्रपा तठस्थ बसेमा सबैभन्दा ठूलो असर एमालेलाई पुग्नेछ । किनभने कांग्रेसको गठबन्धनमा ३२ हजार मतभार रहेकाले एमालेलाई नै अप्ठेरो हुने देखिन्छ । रास्वपा चाँडै सरकारमा जाने चर्चाले उसले पौडेललाई मत दिने सम्भावना पनि उत्तिकै छ

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

सशस्त्र प्रहरीको हत्याका अभियुक्त लक्ष्मी महतोले राष्ट्रपति निर्वाचनमा भोट हाल्न पाउने

राष्ट्रपतिको चुनावमा उम्मेदवारले कति खर्च पाउँछन्?

आज देखि राष्ट्रपति निर्वाचनमा प्रचार निषेध 

राष्ट्रपति निर्वाचनमा राप्रपा तठस्थ नबसे ज्ञानेन्द्र शाही के गर्लान् ?

राष्ट्रपतिमा कसलाई भोट हाल्ने भनेर खुल्न आचारसंहिताले रोक्ने

राष्ट्रपति चयनका लागि मतदान जारी, ७ बजेभित्रै परिणाम आइसक्ने