काठमाडौं - आगामी वैशाख ३० गते हुने स्थानीय तह निर्वाचनका लागि उम्मेदवार छान्न नेपाली कांग्रेसले चार तहको संसदीय समिति बनाउने भएको छ ।

विधानअनुसार समिति बनाएर कांग्रेसले उम्मेदवार छनोट गर्न लागेको हो । प्रतिनिधिसभा, जिल्ला, प्रदेश र केन्द्रीय संसदीय समिति रहने कांग्रेस विधानमा छ ।

पार्टी केन्द्रीय कार्यालयका मुख्यसचिव कृष्णप्रसाद पौडेलका अनुसार केन्द्रीय संसदीय समिति गठनबारे निर्णय गर्न ११ चैतमा केन्द्रीय कार्यसमिति बैठक बस्दै छ ।

कांग्रेस विधानको दफा ३१ मा संसदीय समितिसम्बन्धी व्यवस्था छ । दफा ३१ (१) मा संघीय संसद्, प्रदेश सभा र स्थानीय तहको निर्वाचनमा उम्मेदवार चयन गर्न विभिन्न तहमा संसदीय समिति गठन गर्न सकिने उल्लेख छ ।

जसअनुसार वडाध्यक्ष तथा सदस्य, गाउँपालिका अध्यक्ष र उपाध्यक्ष र नगरपालिका, उप–महानगरपालिका र महानगरपालिका प्रमुख र उप–प्रमुखको उम्मेदवारको टुंगो लगाउने अधिकार फरक–फरक संसदीय समितिलाई दिइएको छ ।

कांग्रेसले १४औँ महाधिवेशनपछि कुनै पनि तहको संसदीय समिति भने बनाएको छैन । विधानले महानगरपालिकाबाहेकका स्थानीय तहको उम्मेदवार छनोटको अधिकार केन्द्रलाई दिएको छैन ।

विधानको दफा ३२ (१) मा गाउँ, नगर वडाका अध्यक्ष र सदस्यको उम्मेदवारीबारे व्यवस्था छ । जसमा वडा कार्यसमितिले उम्मेदवारको सिफारिस गर्ने, प्रतिनिधिसभा संसदीय समितिले निर्णय गर्ने र प्रतिनिधिसभा क्षेत्रीय कार्यसमितिबाट अनुमोदन गर्ने व्यवस्था छ ।

गाउँपालिका अध्यक्ष र उपाध्यक्षको सम्बन्धमा गाउँपालिका कार्यसमितिले सिफारिस गर्ने, जिल्ला संसदीय समितिले निर्णय गर्ने र जिल्ला कार्यसमितिबाट अनुमोदन गर्ने व्यवस्था छ ।

त्यस्तै, नगरपालिका र उपमहानगरपालिका प्रमुख र उप–प्रमुखको सम्बन्धमा नगरपालिका र उपमहानगरपालिका कार्यसमितिले नाम सिफारिस गर्ने, प्रदेश संसदीय समितिले निर्णय लिने र प्रदेश कार्यसमितिबाट अनुमोदन गराउनुपर्ने हुन्छ ।

महानगरपालिका प्रमुख र उप–प्रमुखको उम्मेदवारीको हकमा भने महानगरपालिका कार्यसमितिले सिफारिस गर्ने, केन्द्रीय संसदीय समितिले निर्णय लिने र केन्द्रीय कार्यसमिति बैठकले अनुमोदन गर्ने व्यवस्था गरेको छ ।

केही दिनअघि कांग्रेस प्रवक्ता डा.प्रकाशशरण महतले सकेसम्म चाँडै स्थानीय निर्वाचनसम्बन्धी घोषणापत्र सार्वजनिक गर्ने बताइसकेका छन् ।

उनले स्थानीय निर्वाचनमा जहाँ जो उठाउँदा बढी मत आउँछ र जित्ने सम्भावना हुन्छ उसैलाई टिकट दिने नीति कांग्रेसले लिएको बताइसकेका छन् ।

अब उम्मेदवारी दर्ताको समय एक महिना पनि बाँकी नरहेकाले कांग्रेसले चैत मसान्तभित्र सात सय ५३ वटै स्थानीय तहबाट रिपोर्ट प्राप्त गरेर छलफलपछि उम्मेदवार तय गर्ने नेताहरूले बताएका छन् ।

गठबन्धनमा रहेका माओवादी केन्द्र, एकीकृत समाजवादी र जसपासँग स्थानीय तहमै तालमेल गरेर निर्वाचनमा जाने कि एक्लै जाने भन्ने निर्णय कांग्रेसले अहिलेसम्म लिन सकेको छैन । कांग्रेसमा बहुमत पक्ष एक्लै चुनावमा जानुपर्ने पक्षमा देखिएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

कांग्रेस नेता महर्जनको खाना खुवाउने अभियानमा कराँते चेलाको सहयोग

केपी ओलीलाई संसदमा संकट : कांग्रेसले बनायो ‘आक्रामक’ रणनीति, नेकपाभित्रै विरोध

केपी ओलीविरुद्ध संसदमा देउवाको हुँकार, सबैका सामुन्ने खोले एकसे एक पोल !

कांग्रेसकी यी महिला सांसदले पाइन् संसदमा ठूलो जिम्मेवारी !

सिमा अतिक्रमण भएपछि तरुण दल कम्युनिस्ट सरकारसँग आक्रोशित, तत्कालै उचित कदम चाल्न ध्यानाकर्षण

लगनखेल डोजोको भोजन वितरणमा कांग्रेस नेताहरूको सहयोग