काठमाडौं - काठमाडौँको कमलादीमा निर्माण भएको स्काई वाक टावरमाथि काठमाडौँ महानगरपालिकाले छानबिन सुरु गरेको छ ।

७८.५ मिटर अग्लो स्काई वाक टावरबारे मेयर बालेन्द्र साह बालेनले प्राविधिकदेखि सबै पक्षको अध्ययन सुरु गर्न निर्देशन दिएका छन् ।

महानगरपालिकाका प्रवक्ता नवीन मानन्धरका अनुसार टावर निर्माण तथा सञ्चालनमा महानगरमा पूरा गर्नुपर्ने कानूनी प्रक्रिया पूरा भए नभएको, पार्किङ क्षेत्र र त्यसको शुल्क तथा गुणस्तरको समेत अनुसन्धान थालिएको छ ।

टावर चढ्ने ग्राहकबाट प्रतिव्यक्ति एक हजार रुपैयाँ शुल्क लिने गरिएकोमा समेत महँगो भएको भन्दै सर्वसाधारणबाट आलोचना भइरहेको छ । महानगरले यस सम्बन्धमा पनि अध्ययन सुरू गरेको छ ।

स्काई वाक टावर वन्डर्स ग्रुप प्रालिले सञ्चालनमा ल्याएको हो । यो टावर दक्षिण एसियाकै अग्लो स्काई वाक टावर रहेको दाबी गरिएकोमा महानगरले दक्षिण एसियाकै अग्लो भनिएको टावरमा प्रयोग भएका सामान तथा यन्त्र उपकरणहरु सोही स्तरको गुणस्तरीय भए नभएको प्रमाण खोजिएको जनाइएको छ ।

महानगरले टावर सञ्चालक कम्पनीसँग विवरण माग गर्न लागेको छ । यो टावर सहितको परियोजना १३ रोपनी क्षेत्रफलमा फैलिएको छ । परियोजनाको लागत करिब दुई अर्ब रूपैयाँ रहेको बताइएको छ ।

काठमाडौंका सुन्धारा क्षेत्रमा सरकारले बनाइरहेको धरहरा अहिलेसम्म पूरा भएको छैन । जबकि धरहरा चाँडै निर्माण भए ५० देखि एक सय रुपैयाँमा सर्वसाधारणले काठमाडौंको अवलोकन गर्न पाउने थिए ।

तर निजी क्षेत्रले तुरुन्तै स्काई वाक टावर बनाएर प्रवेश शुल्क नै एक हजार रुपैयाँ लिएर ब्रह्मलूट मच्चाइरहेको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।