काठमाडौँ- नेपाल तरुण दलका अध्यक्ष एवम् कांग्रेसका युवा नेता जितजंग बस्नेतले सरकार, सदन र जंगलको कम्युनिस्टका लागि कांग्रेस सडकमा नजाने बताएका छन्।

नेपाली कांग्रेस ललितपुरले सोमबार जावलाखेलमा आयोजना गरेको विरोध सभालाई सम्बोधन गर्दै बस्नेतले राष्ट्र, लोकतन्त्र, संविधान र कानूनी शासनका लागि कांग्रेस एक्लै सडकमा जाने चेतावनी दिएका हुन् ।

‘प्रतिनिधि सभाको निर्वाचनमा हारेका नाराणकाजी श्रेष्ठ र वामदेव गौतमलाई राष्ट्रिय सभामा लैजाँदा संविधान मिचियो कि मिचिएन ?’, उनले प्रश्न गर्दै भनेका छन्, ‘स्वार्थ मिल्दासम्म तीन वर्ष भागबण्डा गरेर बसे । सत्तास्वार्थमा कुरा नमिलेपछि संविधान मिचियो भन्दै सडकमा आएका छन् । कम्युनिस्टहरूको कुर्सी र स्वार्थ हामीले मिलाइदिनुपर्ने ?’ उनले भने, ‘कांग्रेस सडकमा थियो । सडकमा छ । आज पनि जनताकै बीचमा छ । सत्तामा पनि छ । आन्दोलन गर्न प्रचण्डले सिकाउनु पर्दैन ।’

अध्यक्ष बस्नेतले भनेका छन्, ‘कम्युनिस्टले आजसम्म देशलाई के दिए ? केही पनि दिएको छैन ।’ संसद विघटनको कुरा असंवैधानिक भनेर कांग्रेसले विरोध गरिसकेको भन्दै सडकमा आन्दोलन गरिरहेको उनले बताएका छन् ।

‘संसद विघटन भएपछि कांग्रेसले असंवैधानिक भनेर आन्दोलन ल्याएको छ’, उनले भने, ‘प्रचण्डको लेनदेनमा कुरा मिल्दैन । त्यसपछि सडकमा जान्छन् । तीन वर्षसम्म मिल्ने । लेनदेनमा कुरा नमिलेपछि संवैधानिक घटनाहरू भन्ने ? अहिले कुरा नमिल्दा संविधान मिचियो भन्ने ?’ तरुण अध्यक्ष बस्नेतले दुई ठाउँबाट हारेका माधव नेपाल बालुवाटारको ललिता निवासको सरकारी जग्गा बेच्न प्रधानमन्त्री मन्त्री बनेको आरोप लगाएका छन् ।

‘माधव नेपालले बालुवाटार बेच्न हुने’, उनले भने, ‘जनतालाई कोभिडविरुद्धको भ्याक्सिनमा बोल्न नपर्ने ?’ उनले झलनाथ खनाललाई सर्प पाल्न लिएको ७० करोड फिर्ता गर्न सुझाव दिएका छन् । कोरोनाविरुद्धको भ्याक्सिन किन्न ७० करोड फिर्ता गरे खनाललाई कांग्रेसको सरकार आयो भने ९० करोड रुपियाँ दिलाइदिने अध्यक्ष बस्नेतले आश्वासन दिएका छन् । बाबुराम भट्टराईलाई सबैभन्दा ठूलो बुद्धिजीवी भनेर व्याङ्ग्य गरेका तरुण अध्यक्ष बस्नेतले भने, ‘बाबुरामजीले संविधान बनाउन पनि नसक्ने । सरकार छाड्नेवित्तिकै अर्को पार्टीमा जानुपर्ने । लेनदेन नमिले पार्टी फुटाउने । कांग्रेसले जिताउनुपर्ने । तिजेको दिनमै कांग्रेसलाई म्युजियममा राख्नुपर्छ भन्ने । कम्युनिस्टलाई जिताउने ठेक्का कांग्रसको होइन ।’

‘कम्युनिस्टसँग सहकार्य हुँदैन । जंगल, सरकार या सदनको कम्युनिस्टसँग कसैसँग पनि सहकार्य हुँदैन’, उनले भनेका छन्, ‘सत्ताको लेनदेन नमिलेपछि संसद भङ्ग गर्ने । सडकमा जानेहरूको पक्षमा कांग्रेस छैन । आन्दोलन गर्नुपर्दा कांग्रेस एक्लै आफ्नै बलबुताले गर्छ ।’

राजदरबारको अगाडि बसेर सर्वोच्चलाई औँला नठड्याउन प्रधानमन्त्री केपी ओलीलाई बस्नेतले चेतावनी दिएका छन् । उनले प्रचण्डलाई पनि रत्नपार्कबाट सर्वोच्च अदालततिर औँला नदेखाउन सचेत गराएका छन् ।

‘सर्वोच्च अदालतलाई धम्काउने काम नहोस् । धम्काउने कार्य भयो भने यो राष्ट्र नहुन सक्छ’, उनले भनेका छन् । ‘संविधानको ब्याख्या गर्ने जिम्मेवारी सर्वोच्चलाई दिइएको छ’, उनले भने, ‘संसद पुनःस्थाना भयो भने कांग्रेस तेस्रो पार्टी भएर सदनमा बस्छ । संसद विघटन सदर भयो भने पनि कांग्रेस चुनावमा जान तयार छ ।’

‘ब्याख्या सर्वोच्चले गर्छ’, अध्यक्ष बस्नेतले भने, ‘जनताबाट निर्वाचन गरेर जनतम ल्याएर पनि जान सकिन्छ ।’ देश बनाउने जिम्मेवारी कांगेसको काँधमा आएको भन्दै तयारी अवस्थामा बस्न उनले अनुरोध गरेका छन् ।

‘प्रचण्डले कुम हल्लाउँदा र सडकमा बस भन्दैमा कांग्रेसले सडकमा आएर प्रचण्डलाई सहयोग गर्दैन’, उनले भने, ‘प्रचण्डले कांग्रेसलाई पटक पटक धोका दिएका छन् । कांग्रेसले प्रचण्डलाई जंगलबाट ल्याएर ८७ सिट दिएको हो । प्रचण्डले चुनाव कसरी जित्नुभयो हामीलाई थाहा छैन र ? सबै कुरा जानकारी छ ।’ कांग्रेसको कुनै पनि कम्युनिस्टसँग सहकार्य नहुने उनले बताएका छन् ।

‘पञ्चायतको गर्भबाट जन्मिएको कम्युनिस्टसँग सहकार्य र समझदारी हुँदैन’, तरुण अध्यक्ष बस्नेतले भनेका छन् । संविधान र कानूनको कुरा गर्ने रामकुमारी झाँक्री, प्रचण्ड र माधव नेपालले रामचन्द्र पौडेललाई तनहुँमा दुरव्यवहार गर्दा कुन दुलोभित्र थिए भनेर अध्यक्ष बस्नेतले प्रश्न गरेका छन् ।

झाँक्रीलाई प्रहरीले पक्राउ गर्दा तरुण दल र नेपाली कांग्रेसले बोलेको उनले बताए । विरोध सभामा कांग्रेसका प्रवक्ता विश्वप्रकाश शर्मा, ललितपुर कांग्रेसका सभापति मदनबहादुर अमात्यलगायतका नेताहरूले सम्बोधन गरेका थिए ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

कांग्रेस र लाेकतन्त्र बचाउन तरूण सडकमा आउनुपर्नेछः जितजंग बस्नेत

तरुण दलले गर्यो वृद्धावस्था व्यवस्थापन गुठिमा फलफुल तथा स्वास्थ्य सामाग्री वितरण

तरुण दलले गर्यो पाटन र बीर अस्पतालमा स्वास्थ्य सामग्री वितरण

तरुण दलले स्थापना दिवसमा शिक्षण अस्पताललाई दियो स्वास्थ्य सामाग्री

कांग्रेस नेता भण्डारीले दिए १६ संस्थालाई ६६ थान अक्सीमिटर, तरुण दल अध्यक्षले गरे वितरण

भेरी अस्पतालमा डाक्टर र नर्समाथि कुटपिट गर्नेलाई कडा कारबाही गर्न तरुण दलको माग