काठमाडौं – नेपाल कम्युनिस्ट पार्टी (नेकपा) दुबै पक्षलाई आधिकारिकता दिन अस्वीकार गरेको निर्वाचन आयोगले शुक्रवार छलफलमा बोलायो ।

प्रधानमन्त्री केपी शर्मा ओली पक्ष छलफलमा बस्यो तर पुष्पकमल दाहाल ‘प्रचण्ड’–माधवकुमार नेपाल पक्षले थप समय माग गर्‍यो ।

आयोगले निर्वाचन तयारीबारे जानकारी दिने, निर्वाचन प्रयोजनका लागि दल दर्ता गर्न आग्रह गर्ने उद्देश्यले दुबै पक्षसँग संयुक्त छलफल गर्न खोजेको थियो ।

प्रचण्ड–नेपाल पक्षका राजेन्द्र पाण्डे, लीलामणि पोखरेल, मुक्ति प्रधानले अध्यक्षद्वय प्रचण्ड र नेपाल उपत्यकाबाहिर रहेकाले अर्को कुनै दिन छलफल गराउन आयोगलाई पत्र बुझाए । ‘पार्टी अध्यक्ष माधवकुमार नेपाल र अध्यक्ष पुष्पकमल दाहाल ‘प्रचण्ड’ दुबै अध्यक्ष माघ १८ गतेसम्म उपत्यका बाहिरका राजनीतिक कार्यक्रममा व्यस्त रहनु भई प्रतिनिधि मनोनयन गर्ने अवस्था नभएको र उक्त छलफलमा अध्यक्ष स्वयं उपस्थित भई छलफल गर्न चाहनु भएको हुँदा सोको लागि आज तोकिएको समयमा सम्भव हुन नसकेको बेहोरा अवगत गराउँछु,’ पार्टी केन्द्रीय कार्यालयका सचिव श्रीराम ढकालले हस्ताक्षर गरेको पत्रमा लेखिएको छ ।

पत्रमा आयोगसँगको छलफलमा अध्यक्षद्वय नेपाल र प्रचण्ड नै सहभागी हुन चाहेको उल्लेख छ ।

आयोगले दुबै पक्षका अध्यक्ष वा अध्यक्षले तोकेका प्रतिनिधि र निर्वाचन तथा कानून विषय हेर्ने प्रतिनिधि समेत ५/५ जना उपस्थित गराइदिन माघ १४ गते दुबै पक्षलाई पत्र पठाएको थियो ।

प्रचण्ड–नेपाल पक्षले थप समय मागेपछि आयोगले ओली पक्षबाट प्रतिनिधित्व गरेका सुवास नेम्बाङ सहितका नेताहरुसँग अनौपचारिक छलफल चलायो । प्रमुख निर्वाचन आयुक्त दिनेशकुमार थपलियाले निर्वाचन तयारीका सम्बन्धमा हालसम्म गरेका प्रगतिबारे जानकारी दिएको प्रवक्ता राजकुमार श्रेष्ठले बताएका छन् ।

निर्वाचन आयुक्त ईश्वरीप्रसाद पौड्यालले तोकिएको मितिमा निर्वाचन सम्पन्न गर्न कुनै पनि कमी कमजोरी नहुने किसिमबाट तयारी गरिरहेको बताए । निर्वाचन सम्पन्न गर्न राजनीतिक दलहरुबाट पूर्णरूपमा सहयोग हुने अपेक्षा आयुक्त पौड्यालले राखेका थिए । पौड्यालले निर्वाचन गर्न राजनीतिक वातावरण बनाउनुपर्ने भन्दै आयोगले उपयुक्त समयमा नेकपाका दुबै पक्षसँग पुनः बैठकको आयोजना गर्ने बताएका थिए ।

ओली पक्षका प्रतिनिधि नेम्बाङले दल दर्ता प्रक्रिया र निर्वाचनका सबै कार्यक्रम अघि बढाउन आयोगलाई सुझाव दिएको बताएका छन् । ‘अदालतले अर्कै आदेश गरेछ भने फरक कुरा हो, नत्र भने निर्वाचन आयोग लगायत हामी सबै निर्वाचनमा जुट्नुको विकल्प छैन,’ छलफलपछि नेम्बाङले पत्रकारसँग भने ।

आयुक्त पौड्यालले नेकपाका कुनै पनि पक्षलाई आधिकारिकता नदिइएको प्रष्ट गरे । ‘दाजुभाइबीच झगडा भएको तर अदालतमा अंशबन्डाको मुद्दा नपरेको अवस्था हो,’ उनले भने । पौड्यालले नेकपाका दुबै पक्षले निर्वाचन आयोग ऐनअनुसार आधिकारिकताको दाबी नगरेको बताए । ‘उहाँहरूले नमागेको आधिकारिकता दिएर आयोगले पार्टी फुटाइदिने हो र ?’ उनले भने ।

नेम्वाङले भने दलको आधिकारिकताबारे आयोगले निर्णय गरिसकेको र त्यसअनुसार नै निर्वाचन कार्यक्रम अघि बढेको दाबी गरेका छन् ।

यसअघि आयोगले दुबै पक्षलाई आयोग ऐनको दफा ४४ अनुसार दल आधिकारिकताको दाबी गर्न पत्र पठाएको थियो । तर दुवै पक्षले दफा ४४ अनुसार नभई दफा ५१ अनुसार विधान संशोधन र पदाधिकारी हेरफेरको पत्र पठाएको भन्दै आयोगले दुवै पक्षका कामलाई मान्यता नदिने निर्णय गरेको थियो ।

ओली पक्षले अर्का अध्यक्ष प्रचण्डको कार्यकारी अधिकार खोसिएको र केन्द्रीय समिति विस्तार गरिएको पत्र आयोगमा पठाएको थियो भने प्रचण्ड–नेपाल पक्षले ओलीलाई अध्यक्षबाट हटाएर नेपाललाई अध्यक्ष बनाइएको पत्र आयोगमा पठाएको थियो । आजको अन्नपूर्ण पोस्ट दैनिकमा समाचार प्रकाशित छ । 

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

प्रचण्डको गोप्य षड्यन्त्र थाहा पाएपछि केपी ओली पार्टीबाट भागे, ‘जे मन लाग्छ त्यही गर्नुस्’

नेकपामा बल्झियो भयंकर लफडा, यस्तो छ बैठक स्थगित हुनुको भित्रि रहस्य !

प्रधानमन्त्री बन्न वामदेव गौतमले निकाले अर्काे नयाँ ‘आइडिया’ !

ईश्वर पोखरेलले प्रचण्डलाई बोकाए ठूलो दोषको भारी !

धुम्बाराहीबाटै उठ्यो ओलीविरुद्ध विद्रोह, भीम रावल र जनार्दन शर्मालाई नेतृत्व !

नेकपा फुट्नै लागेको हो ? किसुनजीलाई सम्झिँदै नारायणकाजीले गरे भावुक खुलासा