काठमाडौं - कोरियन भाषा परीक्षा विवादमा दैलेख र अछामका दुई युवाले ललितपुरको बालकुमारीमा प्राणको आहुति दिए ।

दैलेखका सुजन रावत र अछामका वीरेन्द्र शाह प्रहरीको दमनका कारण मर्न विवश भए ।

इपिएसमार्फत दक्षिण कोरिया जान खोजेका रावत र शाहले देशकै संघीय राजधानीमा मर्न विवश हुनुले धेरै विषयमा राज्य चुकेको विश्लेषण हुन थालेको छ ।

देशमा रोजगारीको अवसर नहुँदा विदेश जान नेपाली युवा विवश छन् । त्यही रोजगारीका लागि विभिन्न बाटो हुँदै नेपाली युवा खाडी मुलुकदेखि युद्ध्रग्रस्त युक्रेन, रुस, इजरायललगायतका देशमा पुगेका छन् ।

पछिल्लो समय रुस, युक्रेन, इजरायल पुगेका नेपाली युवा बन्दुकको गोली र बम प्रहारबाट मारिएको खबर आइरहेका छन् ।

केही समयअघि प्यालेस्टाइनी विद्रोही समूह हमासले एकैपटक १० नेपाली युवाको हत्या गरे ।

लर्न एन्ड अर्न प्रणालीअन्तर्गत कृषि अध्ययन गर्न इजरायल पुगेका विद्यार्थीमध्ये १० जना मारिँदा देशले ठूलो क्षति बेहोर्नुपरेको बताइएको थियो ।

त्यसयता पनि नेपाली युवा मारिने क्रम र बेपत्ता पारिने क्रम जारी छ । युक्रेनसँगको लडाइँमा रुसी सेनामा भर्ना भएका एक सयभन्दा बढी नेपाली युवामध्ये पाँच–सातजनाले ज्यान गुमाइसकेका छन् । कतिपय युक्रेन सैनिकले बन्दी बनाएको छ ।

विभिन्न बाटो हुँदै रुस र युक्रेन पुगेका नेपालीलाई उद्धार गरेर आफ्नै देशमा फर्काएर रोजगारी दिनुपर्ने अवस्थामा रहेको राज्यले आफैंले दुई निर्दोष युवाको ज्यान लिएपछि अहिले देशमा किन बस्ने भन्ने आवाज उठेको छ ।

अहिलेको यो अवस्था ल्याउनमा ठूला दल र तिनका नेता बढी जिम्मेवार छन् ।

देशमै योग्यताअनुसार उचित रोजगारीको अवसर भएको भए कोही पनि नेपाली युवायुवती ज्यान जोखिममा राखेर लाखौं खर्च गरी विदेशी भूमिमा जान पर्दैनथ्यो ।

तर सरकार र दलको अकर्मण्यताका कारण अहिले सुजन र वीरेन्द्र जस्ता धेरै युवा देशले गुमाउँदै जाने परिस्थिति निर्माण भएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।