काठमाडौं - प्रदेश २ को सभापतिमा उम्मेदवारी दिने तयारीमा रहेका कृष्ण यादवले रौतहट कांग्रेसको संगठन समाप्त पार्ने कसम नै खाएका छन् ।

संस्थापन पक्षबाट प्रदेश २ को सभापति उठ्न लागेका यादवले आफ्नो गृहजिल्लामा चारवटै प्रतिनिधिसभा निर्वाचन क्षेत्रका केन्द्रीय महाधिवेशनको सूची नै गायब गरेका छन् ।

कांग्रेसले पठाएका जिल्ला निर्वाचन अधिकृत दिनेश रेग्मीलाई आफ्नो प्रभावमा पारेर रौतहटका कांग्रेस सभापतिसमेत रहेका यादवले धाँधलीको पनि चरम नमूना प्रस्तुत गरेका छन् ।

जिल्लामा उनका प्रतिस्पर्धी कांग्रेस नेता मोहम्मद अफताव आलम जेलमा रहेको मौका छोपी यादवले जिल्लामा कांग्रेसमा भाँडभैलो नै मच्चाएका छन् । आलमले यादवसँग जिल्लामा आत्मसमर्पण गरेपछि उनको फूर्ति बढेको हो ।

कतिसम्म भने यादवले रौतहटको प्रतिनिधिसभा निर्वाचन क्षेत्र १, २ र ३ मा क्षेत्रीय प्रतिनिधिलाई खाली कागजमा हस्ताक्षर गर्न लगाएर क्षेत्रीय अधिवेशन सम्पन्न भएको घोषणा गरेका छन् ।

तर, अहिलेसम्म तीनवटै निर्वाचन क्षेत्रबाट को को क्षेत्रीय सभापति बने र ७५ जना केन्द्रीय महाधिवेशन प्रतिनिधि को को छनोट भए भन्ने समेत कसैले भेउ पाएको छैन । जिल्ला निर्वाचन अधिकृत रेग्मी जतिबेला पनि रेस्टुरेन्टमा मदिरा सेवन गरेर बसेको भेटिन्छ ।

यादवले जिल्लामा एकलौटी ढंगले क्षेत्रीय अधिवेशन गराउन थालेपछि रौतहट ४ का कांग्रेसका क्षेत्रीय प्रतिनिधिले विद्रोह गरेका थिए । ४ नम्बर क्षेत्रमा पाँच सय १ जना क्षेत्रीय प्रतिनिधि रहेका छन् ।

त्यसमध्ये एक सय ८० जनाले निर्वाचनमार्फत क्षेत्रीय अधिवेशन गर्नुपर्ने भन्दै जिल्ला निर्वाचन कार्यालयमा विरोध पत्र बुझाउदै घेराबन्दी गरेपछि मंसिर १५ गते क्षेत्र नम्बर ४ को अधिवेशन भएको थियो ।

अधिवेशनमा कृष्ण यादव पक्षका प्रेमकुमार यादव नेतृत्वको प्यानल लज्जास्पद ढंगले पराजित बन्यो । रामसिंह यादव क्षेत्र नम्बर ४ को सभापतिमा प्यानलसहित निर्वाचित भए ।

साथै, २५ जना महाधिवेशन प्रतिनिधिमध्ये कोही पनि कृष्ण यादव पक्षका नपरेपछि उनले अहिलेसम्म नवनिर्वाचित कार्यसमिति र महाधिवेशन प्रतिनिधिको सूची नै गायब गरिदिएका छन् ।

आफ्नो पक्षका कोही पनि महाधिवेशन प्रतिनिधिमा नआएपछि यादवले निर्वाचन समितिमा उजुरी हाल्न लगाई अधिवेशनमा धाँधली भएको भन्दै विवादित बनाउन खोजेका छन् ।

यादवकै निर्देशनमा निर्वाचन अधिकृत रेग्मीले समेत क्षेत्र नम्बर ४ को अधिवेशन विवादित बनेको र छानबिन प्रतिवेदन तयार भएपछि मात्र महाधिवेशन विजयी महाधिवेशन प्रतिनिधिलाई प्रमाणपत्र दिने जवाफ दिएको रौतहट कांग्रेसका एक नेताले मिडियाडबलीलाई बताए ।

स्रोतका अनुसार यादवले प्रदेश अधिवेशन र केन्द्रीय महाधिवेशनमा रौतहटबाट छनोट भएका महाधिवेशन प्रतिनिधिलाई वञ्चित गराउन खोजेका छन् । जबकि उनी आफैै शनिबार हुने प्रदेश सभापतिमा उम्मेदवारी दिँदैछन् ।

प्रदेश २ को सभापतिमा रामसरोज यादवले पनि उम्मेदवारी दिँदैछन् । रामसरोज पार्टी उपसभापति विमलेन्द्र निधि पक्षका हुन् । तर, निधिले पनि रौतहटमा कृष्ण यादवले देखाएको कृष्णलीलाबारे चुइँक्क बोल्न सकेका छैनन् ।

 

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

कांग्रेस मधेस प्रदेश दलको नेतामा कृष्ण यादव निर्वाचित