ओलीलाई १५ दिनभित्र लखेटेर एमाले पार्टी कब्जा गर्न माधव नेपाल पक्षको यस्तो ‘प्लान’
ओलीलाई १५ दिनभित्र लखेटेर एमाले पार्टी कब्जा गर्न माधव नेपाल पक्षको यस्तो ‘प्लान’
काठमाडौं – प्रमुख प्रतिपक्षी दल नेकपा एमालेका वरिष्ठ नेता माधवकुमार नेपाल पक्षका सांसदले केही हप्ताभित्र पार्टी अध्यक्ष तथा संसदीय दलका नेता केपी शर्मा ओलीलाई बहुमतले लखेटेर पार्टी कब्जा गर्ने ‘प्लान’ बनाएका छन् ।
कांग्रेसका सभापति तथा प्रधानमन्त्री शेरबहादुर देउवालाई विश्वासको मत दिएका नेपाल पक्षका २२ सांसदले संसदीय दलमा बहुमत सिर्जना गर्ने प्रयास भइरहेको जनाएका छन् ।
नेता नेपाल पक्षका सांसदले बुधबार शंखमुलस्थित सहाना प्रधान स्मृति प्रतिष्ठानमा आयोजना गरेको छलफलमा नेता नेपालले सबै सांसदका सल्लाह सुझाव सुनेका छन् ।
छलफलमा सहभागी १९ जना सांसदले संसदीय दलमा बहुमत पुर्याउने अन्तिम प्रयास गर्नुपर्ने बताएका बैठकमा सहभागी सांसद मेटमणि चौधरीले जनाएका छन् ।
चौधरीले भने, ‘अबको १५ दिन हामी संसदीय दलमा बहुमत पुर्याउने प्रयासमा लाग्छौं । बहुमत पुर्याएर केपी ओलीलाई संसदीय दलको नेताबाट हटाउँछौं र सरकारमा पनि सहभागी हुन्छौं । सरकारमा सहभागी हुने विषयमा सबै माननीयहरुको एकमत छ ।’
बैठकमा सहभागी सांसद विरोध खतिवडाले संसदीय दलमा बहुमतको प्रयासमा लाग्नेबारे छलफल भएको बताएका छन् ।
नेपाल पक्षकै सांसद कल्याणी खड्काले संसद विघटन अदालतले बदर गरेर कार्यान्वयन समेत भइसकेकाले सांसदहरु स्वतः संविधान, लोकतन्त्र र व्यवस्था जोगाउने पक्षमा आउने तर्क गरेकी छन् ।
सांसद खड्काले भनिन्, ‘संसद पुनःस्थापनालाई त सबै माननीयहरुले स्वीकार्नुभएको छ । सानदार रुपमा संसदमा आउनुभएको छ । अदालतको निर्णयलाई कार्यान्वयन गर्नुभएको छ । संसद् पुनःस्थापना गलत थियो भने त उहाँहरु राजीनामा दिएर हिँड्नुपर्ने हो । त्यो त कसैले गर्नुभएन । त्यसैले उहाँहरु संविधान र लोकतन्त्र जोगाउने पक्षमा आउनुहुन्छ भन्ने विश्वास लिएका छौं ।’
नेपाल पक्षको बैठकमा सहभागी सांसदले सम्मान सहितको पार्टी एकता हुँदा स्वीकार्न सकिने तर लतारिएर नजाने अडान दोहोर्याएका छन् । ‘पार्टी अध्यक्षले संसद विघटन गर्नु गल्ती थियो भन्ने स्वीकारेर कमजोरी सच्याउन तयार हुन्छन् भने पार्टी एकताको लागि सदैव तयार रहनुपर्छ,’ एक सांसदले भने ।
छलफलमा सांसदका कुरा सुनेपछि नेता नेपालले पार्टी अध्यक्षले कमीकमजोरी सच्याउँछन् भने पार्टीमा जहाँसुकै रहेर पनि काम गर्न तयार रहेको बताएका थिए । नेपालले भने, ‘माधव नेपाल पदको लागि लडेको होइन । अहिले पद खोज्यो भनेर पदलोलुप देखाउन खोजिएको छ । हामीले संविधान र व्यवस्था जोगाएका हौं । यो ठीक काम गरेका छौं । कमीकमजोरी सच्चिन्छन् भने जहाँ बसेर पनि पार्टीको काम गर्न तयार छु ।’
तत्कालका लागि सरकारमा जाने वा नजाने भन्ने कुरा गौण भएको नेता खड्काले बताइन् । ‘हामीले बाध्यात्मक अवस्थामा संविधान र व्यवस्था जोगाउने काम गरेका हौं । पदका लागि यी सबै काम गरेका होइनौं । सरकारमा जाने वा नजाने भन्ने गौण कुरा हो,’ उनले भनिन् ।
मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।
यो पनि
मिडिया डबली
लेखकबाट थप
ताजा अपडेट
ट्रेन्डिङ
-
डबली नेटवर्क्स प्रा.लि, अनामनगर, काठमाडौँ
- फोन नम्बर :९८०११२३३७१
- [email protected]
- वेबसाईट: www.mediadabali.com
- सूचना विभाग दर्ता नं.::१८१/ ०७३ -०७४