केपी ओलीलाई अर्काे झड्का, पार्टीभित्रै बहिष्कार !
केपी ओलीलाई अर्काे झड्का, पार्टीभित्रै बहिष्कार !
फाइल तस्वीर
काठमाडौं – सत्तारुढ दल नेकपा एमालेका वरिष्ठ नेता झलनाथ खनाल र माधवकुमार नेपाल पक्षले आज शुक्रवार बस्ने केन्द्रीय कमिटी बैठक बहिष्कार गर्ने भएको छ ।
बिहीवार बसेको नेपाल पक्षको स्थायी कमिटी बैठकले केन्द्रीय कमिटी बैठक बहिष्कार गर्ने निष्कर्ष निकालेको हो ।
एमाले स्थायी कमिटीका सदस्य रघुजी पन्तले अवैधानिक महाधिवेशन आयोजक कमिटीले बोलाएको केन्द्रीय कमिटी बैठकमा सहभागी नहुने जानकारी दिए ।
बुधवार बसेको एमालेको १० औं महाधिवेशन आयोजक कमिटीको बैठकले शुक्रवारका लागि केन्द्रीय कमिटीको बैठक बोलाएको थियो । बैठकमा सहभागी हुन एमालेको केन्द्रीय सचिवालयले पत्राचार समेत गरेको छ । प्रधानमन्त्री समेत रहेका एमाले अध्यक्ष केपी शर्मा ओलीले महाधिवेशन आयोजक कमिटी विघटन गरी केन्द्रीय कमिटीको बैठक बोलाएका छन् ।
‘१० औं महाधिवेशन आयोजक कमिटी नै अवैधानिक रहेकाले अवैधानिक कमिटीले बोलाएको केन्द्रीय कमिटीको बैठकमा सहभागी हुन सक्दैनौं भन्ने हाम्रो निष्कर्ष हो,’ पन्तले भने ।
पार्टी अध्यक्ष ओलीले एमालेलाई माओवादी केन्द्र र एमाले एकताअघिकै अवस्थामा फर्काउन भन्दै केन्द्रीय कमिटीको बैठक बोलाइएको भए पनि पूर्व माओवादीका नेताहरुलाई समेटेर केन्द्रीय कमिटी बनाएका छन् । २६४ जनाको महाधिवेशन कमिटीलाई नै केन्द्रीय कमिटीमा रुपान्तरण गरिएको छ । अध्यक्ष ओली २०७५ जेठ २ गतेमा नफर्किएर आफ्नो पुरानो निर्णय २०७७ फागुन २८ गतेमा फर्किएको आरोप नेपाल पक्षको रहेको छ ।
एमाले नेता युवराज ज्ञवालीले महाधिवेशन आयोजक कमिटीले बोलाएको केन्द्रीय कमिटीको बैठक अवैधानिक रहेकाले आफूहरु सहभागी नहुने बताएका छन् । अध्यक्ष ओलीले बोलाएको केन्द्रीय कमिटीको बैठक सर्वसम्मत रूपमा बहिष्कार गर्ने निर्णय भएको बताउँदै उनले यसबीचमा वार्ताको प्रयास जारी नै राख्ने बताएका छन् ।
उनले सहमतिका लागि औपचारिक रुपमा वार्ता समिति गठन गरेर पार्टी भित्रको समस्या समाधानका लागि प्याकेजमै सहमति गर्नुपर्ने निष्कर्ष बैठकको रहेको बताएका छन् ।
ओली पक्षले केन्द्रीय कमिटीको बैठक बोलाउने र खनाल–नेपाल पक्षले बैठक बहिष्कार गर्ने गरी अगाडि बढे पनि दुबै पक्षका दोस्रो तहका नेता विवाद मिलाउन आन्तरिक गृहकार्यमा जुटेका छन् । सहमति साथ अगाडि बढ्ने विषयमा छलफल गर्दै उनीहरुले विवाद समाधान गर्न केन्द्रित भएको एमाले स्रोतको दाबी छ ।
२०७५ जेठ २ गतेमा नफर्की महाधिवेशन आयोजक कमिटीलाई नै केन्द्रीय कमिटीका रुपमा रुपान्तरण गरिएकाले केन्द्रीय कमिटीको बैठकमा उपाध्यक्ष बामदेव गौतम समेत सहभागी नहुने उनी निकट एक नेताले बताएका छन् । आजको राजधानी दैनिकमा समाचार प्रकाशित छ ।
मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।
यो पनि
मिडिया डबली
लेखकबाट थप
ताजा अपडेट
ट्रेन्डिङ
-
डबली नेटवर्क्स प्रा.लि, अनामनगर, काठमाडौँ
- फोन नम्बर :९८०११२३३७१
- [email protected]
- वेबसाईट: www.mediadabali.com
- सूचना विभाग दर्ता नं.::१८१/ ०७३ -०७४