काठमाडौं – नेपाल कम्युनिस्ट पार्टी (नेकपा) प्रचण्ड–नेपाल पक्षका संसदीय दलका नेता पुष्पकमल दाहाल ‘प्रचण्ड’ले आकस्मिक रूपमा बैठक बोलाएका छन् ।

यसअघि संसद सचिवालयले प्रधानमन्त्री केपी शर्मा ओलीले हालै नियुक्त गरेका प्रमुख सचेतक विशाल भट्टराईलाई मान्यता दिने निर्णय सुनाएको छ ।

आज आईतबार अपराह्न ४ बजे प्रतिनिधिसभा बैठक बस्नुअघि केहीबेरमा सिंहदरबारस्थित दलको कार्यालयमा दलको बैठक बस्ने नेकपा संसदीय दल प्रमुख सचेतक देव गुरुङले बताएका छन् ।

गुरुङका अनुसार बैठकमा अपराह्न ४ बजे बस्ने प्रतिनिधिसभा बैठकमा प्रस्तुति हुने रणनीतिबारे छलफल हुने भएको छ ।

अस्ति शुक्रवार बसेको दलको बैठकमा ओलीले राजीनामा नदिए आईतबार अविश्वास प्रस्ताव दर्ता गर्नेबारे छलफल भएको छ । प्रधानमन्त्री केपी शर्मा ओलीविरुद्ध अविश्वासको प्रस्ताव दर्ता गर्ने वा नगर्नेबारे बैठकमा निर्णय हुने जनाइएको छ ।

नेकपा प्रचण्ड–नेपाल पक्षले ओलीविरुद्ध अविश्वासको प्रस्ताव ल्याउन प्रमुख प्रतिपक्ष दलसँग संवाद गरिरहेको छ । तर पुनर्स्थापित संसदमा निर्णायक भएर आएको  नेपाली कांग्रेस यतिबेला पर्ख र हेरको अवस्थामा रहेको छ ।

केही दिनअघि प्रधानमन्त्री केपी शर्मा ओलीले प्रचण्ड–नेपाल पक्षमा रहेका प्रमुख सचेतक देव गुरुङलाई हटाएर भट्टराईलाई नियुक्त गरेका थिए । ओलीले प्रचण्ड पक्षका प्रमुख सचेतकलाई कारवाही गरेर आफ्नो पक्षका सांसदलाई नियुक्त गरेपछि मान्यता पाएको छ ।

प्रतिनिधि सभामा कुन पक्षले मान्यता पाउने भनेर चासो रहेका बेला ओली पक्षले जितेको छ । अब ओली पक्षकै प्रमुख सचेतकले नेकपाका प्रचण्ड–नेपाल पक्षका सांसदलाई समेत ह्वीप लगाउन पाउने अधिकार पाएका छन् ।

संसद सचिवालयका प्रवक्ता रोजनाथ पाण्डेले आईतबार जानकारी दिँदै भट्टराईलाई प्रमुख सचेतकका रुपमा गाडी र कार्यालयको व्यवस्थापन सचिवालयले गरिसकेको निर्णय सुनाएका थिए ।

नेकपाकै प्रचण्ड–नेपाल पक्षले देव गुरुङ नै प्रमुख सचेतक भएको भन्दै सचिवालयमा पत्र पठाएको भएपनि दल विवादको विषय निर्वाचन आयोगले हेर्ने भएकाले संसदले निर्णय नलिने जनाइएको छ ।

नेकपा दल भित्रबाट भएका कारबाही र अन्य पत्राचार सचिवालयले मान्यता दिने/नदिने अधिकार नराख्ने भन्दै संसद सचिवालयले दल विभाजनको विषय निर्वाचन आयोगको विषय भएको स्पष्ट पारेका छन् । प्रचण्ड पक्षले गरेको कारवाहीको विषयलाई संसद सचिवालयले मान्यता नदिने देखिएको छ ।

आज आईतबार बस्ने बैठकमा नेकपा प्रचण्ड–नेपाल पक्षका सांसदहरू समेत प्रधानमन्त्री ओलीसँगै सत्तारुढ दलकै लहरमा बस्ने भएका छन् । दल विभाजनको औपचारिक पत्र प्राप्त नभइसकेकाले नेकपाका दुबै पक्षका सांसदलाई एउटै लहरमा बस्ने व्यवस्था मिलाइएको संसद सचिवालयले जानकारी दिएको छ ।

प्रवक्ता पाण्डेले भने, ‘दलका २ वटा पक्षको छलफल चलिरहेको र दल विभाजनको औपचारिक पत्र प्राप्त नभइसकेकाले एउटै रोमा बस्ने व्यवस्था मिलाइएको छ ।’

संसद विघटन गर्ने प्रधानमन्त्री ओलीको निर्णयपछि नेकपा २ पक्षमा विभाजित भएको हो । एउटा पक्षको नेतृत्व ओली र अर्को पक्षको नेतृत्व प्रचण्ड र माधव नेपालले गरिरहेका छन् ।

सरकारले पुस ५ गते संसद विघटन गर्ने निर्णय लिएपनि सर्वोच्च अदालतले फागुन ११ गते असंवैधानिक ठहर गर्दै संसद पुनर्स्थापना हुने फैसला गरिसकेको छ ।

यसैबीच, प्रतिनिधिसभा सभामुख अग्नि सापकोटाले  नेपाल कम्युनिस्ट पार्टी (नेकपा) प्रचण्ड–नेपाल पक्षका अध्यक्षद्वय पुष्पकमल दाहाल ‘प्रचण्ड’ र माधवकुमार नेपालसँग भेट गरेका छन् ।

आज आईतबारका लागि आह्वान गरिएको प्रतिनिधिसभा अधिवेशनअघि सापकोटाले प्रचण्ड र नेपाललाई भेटेका हुन् ।

नेकपाभित्र आधिकारिकता विवाद रहेका बेला सभामुख सापकोटाले एउटा पक्षका अध्यक्षद्वय प्रचण्ड र नेपाललाई भेट्नुलाई अर्थपूर्ण रूपमा लिइएको छ ।

आईतबार बिहान सभामुख सापकोटाको कार्यकक्षमा पुगेर प्रचण्ड र नेपालले भेटवार्ता गरेका छन् । सभामुख सापकोटाका प्रेस विज्ञ श्रीधर न्यौपानेले भेटवार्ताको पुष्टि गरे पनि भेटमा भएको कुराकानीको विषयवस्तु थाहा नभएको बताएका छन् ।

आज अपराह्न ४ बजे संसद बैठक बस्दैछ । नेकपा २ पक्षमा बाँडिए पनि औपचारिक रूपमा विभाजित नभइसकेको र दुबै पक्षले आ–आफ्ना संसदीय दलका नेता तथा प्रमुख सचेतक घोषणा गरेको अवस्थामा बस्न लागेको संसद बैठकप्रति सबैको चासो छ ।

संसद सचिवालयले भने प्रधानमन्त्री केपी शर्मा ओलीले हालै नियुक्त गरेका प्रमुख सचेतक विशाल भट्टराईलाई मान्यता दिएको छ ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।

यो पनि

प्रचण्डको गोप्य षड्यन्त्र थाहा पाएपछि केपी ओली पार्टीबाट भागे, ‘जे मन लाग्छ त्यही गर्नुस्’

नेकपामा बल्झियो भयंकर लफडा, यस्तो छ बैठक स्थगित हुनुको भित्रि रहस्य !

प्रधानमन्त्री बन्न वामदेव गौतमले निकाले अर्काे नयाँ ‘आइडिया’ !

ईश्वर पोखरेलले प्रचण्डलाई बोकाए ठूलो दोषको भारी !

धुम्बाराहीबाटै उठ्यो ओलीविरुद्ध विद्रोह, भीम रावल र जनार्दन शर्मालाई नेतृत्व !

नेकपा फुट्नै लागेको हो ? किसुनजीलाई सम्झिँदै नारायणकाजीले गरे भावुक खुलासा