काठमाडौं – मन्त्रिपरिषद् बैठकको निर्णयपछि खुल्न थालेका बैंक तथा वित्तीय संस्थाका कार्यालय बिहीवारदेखि फेरि बन्द हुने भएका छन् ।

नेपाल राष्ट्र बैंकले बैंकलाई सीमित शाखा कार्यालय मात्रै खोल्न निर्देशन दिँदै अधिकांश शाखा बन्द गर्न निर्देशन दिएको छ ।

आईतवारदेखि बैंकहरूले सबै शाखा कार्यालय खोलेर सेवा दिन थालेका थिए । बैंकका कारण पनि सडकमा भीडभाड बढेको गुनासो आएपछि राष्ट्रबैंकले सबै शाखा कार्यालयहरू नखोल्न कडा निर्देशन दिएको छ ।

राष्ट्र बैंकका बैंक तथा वित्तीय संस्था नियमन विभागका प्रमुख देवकुमार ढकालले अब बैंकका कर्मचारीहरूले परिचयपत्र वा बैंकको चिठी देखाएर आवातजावत गर्न नपाउने बताए । सीमित शाखाहरू खोल्नका लागि राष्ट्रबैंकले बुधवार बैंकहरूलाई केही पास वितरण गरेको छ । पास लिएर मात्रै बैंकका कर्मचारीहरू आवातजावत गर्न पाउने भएका छन् ।

ढकालका अनुसार राष्ट्रबैंकले २७ वाणिज्य बैंकहरूलाई २० वटाका दरले पास वितरण गरेको छ भने विकास बैंकहरूलाई १० वटाका दरले पास दिएको छ ।

फाइनान्स कम्पनीहरूलाई ८ वटा र लघुवित्त वित्तीय संस्थाहरूलाई प्रतिसंस्था ५ वटाका दरले पास वितरण गरिएको ढकालले बताएका छन् ।

वाणिज्य बैंकका सीईओहरूको संगठन नेपाल बैंकर्स संघले पनि भोलिबाट सबै शाखा कार्यालय नखोल्ने निर्णय गरेको छ । संघका कार्यकारी निर्देशक अनिल शर्माले आवश्यकता अनुसार थोरै कर्मचारी राखेर केही शाखाबाट मात्रै सेवा दिने मौखिक निर्णय भएको बताएका छन् ।

मिडिया डबली डट कम २०७३ श्रावण १ गतेबाट डबली नेटवर्क्स प्रा. लि द्वारा संचालित नेपाली भाषाको अनलाइन समाचार पोर्टल हो । अनुसन्धान र खोजमुलक समाचारलाई प्राथामिकता राख्ने यस पोर्टलमा सम्प्रेषित समाचारलाई कपि गरि अन्य साइटमा जस्ताको तस्तै राख्न पूर्ण रुपमा निषेध गरिएको छ । कुनै समाचार कपि गर्ने र अनिवार्य रुपमा ब्याक्लिंक नदिएको पाइएमा प्रचलित साइबर कानुन अनुसार कारवाहि गरिने जानाकारी गराइन्छ ।