मेस्सी र स्वारेजको त्यो अन्तिम गोल जसले जितायो बार्सिलोनालाई

मिडिया डबली संवाददाता प्रकाशित : बुधबार, चैत्र २०, २०७५

काठमाडौं – स्पेनिश ला लिगा फुटबलमा लियोनल मेस्सी र लुइस स्वारेजले अन्तिम समयमा गोल गर्दै बार्सिलोनालाई हारबाट जोगाएका छन् । मंगलबार रातिको खेलमा बार्सिलोना भिल्लारियलसंग ४–४ गोलको बराबरीमा रोकिएको हो ।

फिलिप्पे काउटिन्होले १२ औं मिनेटमा गोल गर्दै पाहुना टोलीलाइ सुरुवाती अग्रता दिलाएका थिए । माल्कोमले १६ औं मिनेटमा गोल गर्दै बार्सिलोनाको अग्रता दोब्बर पारे ।

तर २–० को अग्रता टिकाउन नसकेपछि बार्सिलोना ४–२ ले पछाडि पर्यो । २३ औं मिनेटमा स्यामुयल चुकवाजाईले गोल गर्दै घरेलु टोलीले २–१ को स्थितिमा ल्याए । कार्ल टोको इकाम्बीले ५० औं मिनेटमा भिल्लारियलका लागि २–२ को बराबरी गोल फर्काए ।

५० औं मिनेटमा भिसेन्ट इबोरा र ८० औं मिनेटमा कार्लोस बाकाले गोल गर्दै भिल्लारियललाई ४–२ को अग्रता दिलाए । हार नजिक पुगेको बार्सिलोनालाई अन्तिम समयमा गोल दिलाएपछि मेस्सी र स्वारेजले हारबाट जोगाए ।

मेस्सीले ८९ औं मिनेटमा आकर्षक फ्रिकिकबाट गोल गरेका थिए । स्वारेजले इन्जुरी समयमा गोल गरेका थिए । बराबरीपछि ३० खेलबाट बार्सिलोनाको ७० अंक भएको छ । ३० खेलबाटै एथलेटिको मड्रिडको ६२ अंक छ । २९ खेलबाट ५७ अंकको रियाल मड्रिड तेस्रो स्थानमा छ ।