यी हुन् कांग्रेसका दिलदार वडाध्यक्ष, आफ्नो तलबभत्ता शैक्षिक विकासमा खर्च

मिडिया डबली संवाददाता प्रकाशित : मङ्लबार, बैशाख १०, २०७६

http://www.nepatop.com.np/

गोखरा – प्रमुख प्रतिपक्षि दल नेपाली कांग्रेसबाट निर्वाचित गोरखाको शहीद लखन गाउँपालिका–७ का वडाध्यक्ष शरणबाबु श्रेष्ठले आफ्नो तलब भत्तावापतको रकम शैक्षिक क्षेत्रको विकासका लागि खर्च गरेका छन् ।

वडाध्यक्ष श्रेष्ठले पद सम्हालेदेखि अहिलेसम्मको करीब १६ महिनाको तलब भत्ताको रकम वडाभित्र रहेका सामुदायिक विद्यालयको शैक्षिक गुणस्तर विकासका लागि खर्च गरेका हुन् ।

वडाभित्रका सामुदायिक विद्यालयमा कक्षा ५ सम्म अंग्रेजी माध्यमबाट पढाइ शुरू गर्ने निर्णय भएपनि आर्थिक समस्याका कारण कक्षा सञ्चालन गर्न अप्ठ्यारो भएपछि उनले आफ्नो सेवासुविधा विद्यालयलाई उपलब्ध गराएका हुन् ।

‘१६ महिनाको २ लाख ८८ हजार रुपैयाँले ३ विद्यालयका बालबालिकालाई निःशुल्क अंग्रेजी माध्यमको पुस्तक उपलब्ध गराउन पुग्ने रहेछ,’ उनले भने, ‘मैले यस्तो अभियान आफैंबाट थालनी गर्नुपर्छ भनेर सहयोग गरेको हूँ ।’

वडाध्यक्ष श्रेष्ठले वडाभित्रका शहीद स्मृति माध्यमिक विद्यालय, चण्डिका आधारभूत विद्यालय र शहीद लखन थापा प्रावि गरी ३ विद्यालयका विद्यार्थीका लागि उक्त रकमले अंग्रेजी माध्यमको पुस्तक उपलब्ध गराउन पुगेको भए पनि अझै २ विद्यालयमा रकमको अभाव भएको बताए ।

‘स्कूल व्यवस्थापन समितिका अध्यक्ष, अभिभावक सबैलाई बोलाएर छलफल गरी अंग्रेजी माध्यममा लैजानुपर्छ भनेर निर्णय भयो,’ उनले भने, ‘कार्यान्वयनका लागि रकम जुटाउन भने समस्या भयो ।’

अहिले जारी भर्ना अभियानका क्रममा समेत वडा कार्यालयले सबै बालबालिकालाई निःशुल्क अंग्रेजी माध्यमको पाठ्यपुस्तक दिने, पोशाक तथा खाजा उपलब्ध गराउने भन्ने प्रतिबद्धता गर्दै आएको उनले बताए ।

पछिल्लो समय सामुदायिक विद्यालयमा अभिभावक र बालबालिकाको आकर्षण घट्दै गएकाले उनीहरूमा हौसला प्रदान गर्न पनि वडा कार्यालयले यस्तो अभियान सञ्चालन गरी भर्ना गराउँदै आएको वडाध्यक्ष श्रेष्ठले जानकारी दिए ।