बसलाई ट्रकले ठक्कर दिंदा २ जनाको मृत्यु, २१ जना घाईते

मिडिया डबली संवाददाता प्रकाशित : मङ्लबार, जेष्ठ २८, २०७६

http://www.nepatop.com.np/

रौतहट- रौतहटमा रोकिराखेको बसलाई ट्रकले ठक्कर दिंदा २ जनाको घटना स्थलमै मृत्यु भएको छ भने २१ जना घाईते भएका छन् ।

मंगलबार बिहान चन्द्रपुर नगरपालिका १ मंगलपुर स्थित पूर्वपश्चिम राजमार्गमा भारतीय तीर्थयात्री बोकेको बसलाई ट्रकले ठक्कर दिँदा दुईजना भारतीय नागरीकको मृत्यु भएको छ भने दुर्घटनामा २१ यात्रु घाइते भएका छन् ।

काठमाडौंबाट जनकपुरतर्फ जाँदै गरेको ना ६ ख ९०३० नम्बरको तीर्थयात्री सवार बस मंगलपुर नजिक रोकेर राखेको अवस्थामा सोही दिशाबाट आएको को १ ख २६२५ नम्बरको ट्रकले पछाडिबाट ठक्कर दिएको हो । चरण विश्वाल र विजयकुमार जेनाको घटनास्थलमै मृत्यु भएको ईलाका प्रहरी चन्द्रनिगाहपुरले जनाएको हो  ।

जनकपुर मन्दिर दर्शनका लागि हिडेका उनीहरुलाई राजमार्गमा राति १ बजे शौच गर्ने क्रममा ट्रकले पछाडिबाट बसलाई ठक्कर दिँदा दुर्घटना भएको प्रहरीले जानकारी दिएको छ । दुर्घटनामा परि भारतका तीर्थयात्री सज्यकान्ति प्रधान, मञ्जु विष्डा, सुन्दरि वस्तिया, शौरी विहारा लगायतका घाइते छन् ।

विहाराको हात भाँचिएको छ भने सर्वेश्वर जेना र शेषादेव जेनाको शरीरका बिभिन्न भागमा चोट लागेकाले थप उपचारको लागि वीरगञ्ज रिफर गरिएको छ । अन्य घाइतेको चन्द्रपुर र एपोलो अस्पतालमा उपचार भइरहेको छ ।

दुर्घटना लगत्तै फरार ट्रकचालक सुनसरी दुहवी–८ का रमेशकुमार चौधरीलाई नियन्त्रणमा लिईएको ईलाका प्रहरी कार्यालय चन्द्रनिगाहपुरका प्रमुख डिएसपी कवित कटुवालले जानकारी दिए ।