एसइईको परिक्षा अब प्रदेशबाटै संचालन हुने, प्रश्नपत्र फरकफरक रहने

मिडिया डबली संवाददाता प्रकाशित : बिहिबार, माघ १८, २०७४

एजेन्सी – नेपाल सरकारले अर्को वर्षदेखि अर्थात २०७५ देखि माध्यामिक विद्यालय स्तरिय परीक्षा एसइई प्रदेशस्तरमा गर्ने तयारी गरेको जनाएको छ ।

अब विसं २०७५ बाट सात वटै प्रदेशका प्रदेश परीक्षा बोर्डको कार्यालयबाट एसइई सञ्चालन गर्ने तयारी भएको शिक्षा मन्त्रालयका प्रवक्ता डा हरिप्रसाद लम्सालले जानकारी दिए । उनका अनुसार चाँडै नै प्रदेशबाट परीक्षा सञ्चालन गर्ने भनेर मन्त्रालयबाट निर्णयसमेत हुने छ । आगामी २०७५ साल बाट विद्यार्थीहरुले प्रदेशबाटै परिक्षा दिन पाउने गरि काम कार्य गर्न लागेको वताए ।

‘हामी अहिले सात वटै प्रदेशबाट एसइई परीक्षा सञ्चालनको तयारी गर्छौं’, उनले भने, ‘चाँडै नै निर्णय गरेर सञ्चालनको व्यवस्था गर्छौं ।’ उनका अनुसार एउटै मितिमा सञ्चालन भए पनि सात वटै प्रदेशमा सञ्चालन हुने एसइईका प्रश्नपत्र फरक रहने छन् । परीक्षाफल भनेसँगै प्रकाशन गरिनेछ ।

मन्त्रालयले मुलुक संघीयतामा गइसकेपछि शिक्षा ऐन, २०२८ को नवौं संशोधनमा पनि प्रदेशस्तरमा एसइई सञ्चालन भएअनुसार प्रदेशबाट सञ्चालनको तयारी थालिएको मन्त्रालयका सूचना अधिकारी सरस्वती पोखरेलले बताए ।

प्रदेशबाट एसइई सञ्चालनका लागि ६ नं प्रदेशबाहेक सबै प्रदेशमा परीक्षा बोर्डका कार्यालय रहेका छन् ।

मन्त्रालयका प्रवक्ता डा लम्सालले राष्ट्रिय परीक्षा बोर्डको शाखा कार्यालय खोल्न तयारी भइरहेको बताए । यो कार्यको थालनी भएमा विद्यार्थीले सहज वाताबरण बन्ने र सरलता पाउने अपेक्षा पनि गरेको छ ।